利字當頭：逆境都可搵到財路
■1997亞洲金融風暴之後，好多公司要縮減成本，結果速遞呢行反而逆市造好。資料圖片
魚唔過塘唔會肥，年頭年尾，本應有好多打工仔女計劃跳槽過檔。不過，經我非正式社交媒體目測所見，今年莫講話轉工意欲明顯疲弱，甚至連講加人工，也是細細聲講，低調唏噓。
究竟是我觀
察有所偏差？還是真正市道疲弱？有一點可以肯定，今時今日有好多辦公室工序，漸漸被自動化取代。此外，通訊技術成熟，好多操作可以外判去成本更低嘅地區；簡單平面設計、網站設計之類，唔係太高要求，上Upwork又或者Fiverr去搵，一千幾百有交易，你叫香港人點爭？甚至乎，假如你唔識得點樣去用Zapier、IFTTT之類嘅工具，又或者唔識寫Chatbot，用少少錢一樣可以搵到人幫你搞。至於傳統IT Admin，就更加一早俾Google、Zoho之類取代曬。
我同幾個朋友，甚至諗過「共享Admin」；我要星期二、四，佢就用星期一、三、五。點知一問之下，原來有好多朋友都想「共享Admin」。噫，話唔定整個平台處理辦公室工序，分分鐘都係條財路喎！
回想1997亞洲金融風暴之後，好多公司要縮減成本，將Office Boy呢個位慳返，結果速遞呢行反而逆市造好。退一萬步講，會計法律之類，早就係外判專業服務啦！假如你真係相信2018年（又或者可見將來），香港會再出現一次經濟危機，我可以大膽講句，任何形式可以接企業外判嘅公司，都應該有一定生存空間。畢竟工資有個特性，叫downward rigidity，即係易加難減；好多公司真係負擔唔起又要生存，減人工又請唔到人，結果都係要外判。
「外判，一定係欺壓員工啦！」其實我識唔少接幾份job嘅slash，收入唔一定少過一份全職，人生不知幾「疏乎」。重點係佢哋工作有效率，快手完成工作，幫客戶慳錢慳時間，先係真正嘅價值。
利世民
http://fb.com/leesimon.hk
本欄逢周二、四刊出
利世民
利字當頭 - 利世民 舊文
來源 source: http://hk.finance.appledaily.com
