中環在線：萬科換CEO 鬱亮變主席
鬱亮
眼見各大企業陸續派發雙糧花紅，就知又到跳槽旺季，同時都係獵頭公司幫企業搵高級人才嘅好時機。可能求才若渴，而叻人又特別多人爭，好似喺內房龍頭之一萬科（2202）做咗18年總裁嘅鬱亮，噚日會見傳媒時就自爆，佢日前一宣佈唔再兼任萬科總裁同首席執行官
，半夜就接到好多獵頭電話，以為佢唔再做萬科。查實睇真啲，鬱亮仲繼續做萬科主席㗎！
鬱亮點解咁多人爭？睇嚇佢嘅履歷就知曉，北京大學經濟學碩士，1990年加入萬科，用咗11年時間就爬上公司總經理一職，係萬科創辦人王石嘅左右手，更加有「中國企業第一經理人」之稱。
大讚繼任者係「大炮」
鬱亮話，舊年已經有換人做總裁嘅想法，經過多番物色，就搵嚟曾任萬科高級副總裁、投資部門出身嘅祝九勝繼任。
新舊總裁噚日齊齊喺內地現身，鬱亮對繼任者有讚無彈，話兩人喺萬科共事過7年，祝總曾負責嘅資金中心部門，正正係鬱亮組建。鬱亮讚祝總喺公司內部開會係「大炮」（華華估計應該係勇於提意見，斷估唔係話佢「車大炮」嘅！）。
雖然祝總金融背景深厚，但佢就話，未來會加強做地產金融，但萬科唔會直接做金融。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
