港交所概念多
2018年02月21日
雖然外圍表現平穩，但港股狗年首個交易日就紅盤高開低收，似乎是過年前偷步炒後遺症。
滙控(005) 派發2017年成績表，被指低於預期，股價被質低。睇番恒生(011) 業績對辦，最後都頂唔住，可見開唔到紅盤主要係過年前指數已爆升近千點，引發
獲利回吐，反映投資者經過二月跌市後，心態無之前咁雄，寧願低吸打持「狗」戰，好過冒進高追。
銀行派完業績見光死
大笨象喺狗年首個交易日就派成績表，列帳基準除稅前利潤為172億美元，較2016年增加101億美元，增幅141.4%，每股普通股派第四次股息21美仙，全年派息維持51美仙。集團指，有信心維持現時派息水平。去年美國滙豐10年來首次派息，股息亦強勁。他又指，香港零售銀行市場份額亦稍有提升，但香港市場競爭維持激烈，滙控會力爭保持市場份額。候任行政總裁范寧表示，股東權益回報率未達逾10%目標，集團仍需要提升業務效率及增加收入，目標做到收入增長高於成本增長。
市場對滙控預期下限係利潤增長145%，結果略低過下限，故公佈後股價受壓，港股收報80.95元，跌3%。在倫敦股價開市續軟，最新報734.3便士，跌3.5%，折合80.216港元。滙控喺宣佈業績之餘，未公佈具體回購計劃，行政總裁歐智華就派定心丸，話無回購詳情主要係技術因素，唔代表政策有變。
大笨象業績被指未達標，同系恒生去年純利200.18億元，按年升23.48%，每股盈利10.3元，按年升24%；派第四次中期息3.1元。業績雖然靚仔，股價一樣回吐1.6%，收報189.2元。兩大銀行業績出完後股價有壓力，好有趁消息出貨味道，無論係好定壞，由於消息已經見光，跟住少左炒作理由，所以入左貨短線投資者就沽貨換馬。不過等滙控回深啲可以留意，其實佢業績又唔係差到咁，加息始終對佢有利。
美國下個月加息機會高，市場普遍睇好金融股，認為可受惠息差收窄，但短炒投資者依然傾向食胡，好大原因係恒指喺一月份上試高位後急回，幾乎跌去所有升幅，呢個走勢產生兩個心理影響，一係令好多人觀望係咪已經中期見頂；二係覺得有胡唔食，罪大惡極。有中環茶友笑言，今年係狗年，大家唔想狗追狗尾團團轉，所以手緊左。之前個市係咁升，大市進入無阻力區，大家唔知邊度係頂，O依家見到高位回落，圖表派就可以睇位做嘢，低買高沽。
恒指最後一個鐘回得急啲，收報30855，跌241點，都係尾市跌下來；國企指數收報12396，跌138點，成交1078億元。金融股普遍有回吐，平保(2318) 跌2%，港交所(388) 跌0.8%，收造277.8元。
即將卸任的港交所主席周松崗喺開市儀式話，相信今年港交所會有唔少新舉措，行政總裁李小加就話對成交好有信心。周松崗做夠六年主席，今年好大機會交棒俾史美倫，喺佢任內港交所成功推動滬港通、深港通同債券通，O依家就力爭沙特阿美來港掛牌及同股不同權，若然呢啲措施落實，保守估計港股交投隨時可以增加一半以上，所以港交所股價喺去年創出歷史新高，O依家佢市盈率59倍，下周三佢公佈去年業績後市盈率會下降，雖然估值仍然唔算平，不過股票以概念行先，港交所O依家有幾個概念煲緊，仲有好多可憧憬地方，如果相信牛市未死，佢仲係低吸之選。
中播引新股東惹炒作
新年有股仔爆升，中播控股(471) 大升47.5%，佢出公告話，股東結構改變，引入中信國安和中國廣電。新股東係國家重點企業，擁有豐富及全方位的媒體，電信，衛星網絡和增值服務資源，與現有的平台優勢資源互補，令控股公司國廣控股更具能力打造成為國家級、全業務、全資質的新型媒體產業集團和骨幹文化企業，並對國廣中播能提供更強大的支持，快速推進內地衛星移動多媒體和車聯網業務落地。此次結構將對國廣控股以及國廣中播目前實際控制關係有所改變，但並不影響其主體業務和運營資質。雖然公佈對新股東寄望甚殷，但呢類合作有冇料到受好多因素影響，未有實際項目前，只宜視作炒作消息處理。
陸羽仁
金融High Tea 舊文
來源 source: http://hdfin.stheadline.com
