Money Walker：美債息3.5厘料觸頂
■倘若美國2018同2019年兩年再加八次息，2020年估計唔會再加或最多只加一至兩次，就已屆本加息周期極限。資料圖片
近排大家講開個市，總會提及要留意美債息點走，事關美債息急升對股市往往唔係好事。筆者推斷美債息仍有空
間再升並上破3厘，但中期不易升穿3.5厘。
回顧呢幾個月，十年期美債息由2.4厘大升至2.9厘，該0.5厘升幅反映市場已預期今個加息周期會加多兩次息，由今明兩年合共加四、五次，增至六、七次。值得留意嘅係，為遷就記者會安排，聯儲局一般一年頂多加息四次，所以理論上加息預期仍有空間進一步升溫至今明兩年加八次。
如果每次加息步伐都繼續維持0.25厘，按上述加息預期最多升溫一至兩次嘅推測，美債息理論上會隨加息預期最多再升0.5厘，亦即由而家嘅2.9厘攀升至最多約3.4厘。
須留意美債息再重演0.5厘升幅已足以令整體投資市場再次震盪，更未計其突破咗3厘重要心理關口後所衍生嘅市場恐慌。
其實十年期美債息同經通脹調整後之實際債息，兩者至今只係挨近但仍未突破多年橫行區間。事實上，美債息對上一次企穩3厘阻力之上已要追溯返2011年，即使係對上一次上試3厘亦要數到2013同2014年，可想而知3厘有幾大阻力。
筆者認為美債息有機會升穿3厘，但要先經過一輪爭持。倘若美國2018同2019年兩年再加八次息，連同之前四次加息，全個加息周期累計已加12次息，故2020年估計唔會再加或最多只加一至兩次，就已屆本加息周期極限，因此3.5厘好大機會已經係美債息嘅頂部或接近頂部水平。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.finance.appledaily.com
