經濟客艙：沽貨要及時
■經歷過亞洲金融風暴及金融海嘯，有人寧願及早沽物業轉揸現金，總好過跌市來臨卻走唔甩。 資料圖片
炒股賣樓最開心不只是贏錢，而是於適當時間做對了決定，呢種滿足感跟贏錢嘅快感，無可比擬。
聽朋友講，佢有位富貴姨婆沽走持貨多年嘅物業，獲利近千萬，仲
派錢畀自己幾位兄弟姊妹，每位有6位數字，齊齊開心嚇。又聽朋友講，富貴姨婆揀今年沽貨，係因為相信再死揸唔放，怕被「資產還原靚靚拳」打中，慘跌無人賠。
呢位富貴姨婆輕輕鬆鬆帶過追、揸、沽攻略，做到低買高沽，應該係搵到避險策略。幾時入市同幾時沽，屬非常個人嘅決定。有人向經數據埋手，又有人睇圖，又有人信自己嘅直覺。不過，要做富貴姨婆贏大鑊，並非心口掛個勇字，而係最怕一切歸於零。勇字當頭心態，常見於散戶之中，即俗啲講嘅狗衝，接刀後滿手傷。不過，只要仲未決心金盤洗手唔玩，傷口結疤後忘記痛，輸完一次又一次，或者獲利後只打個和。
富貴姨婆最怕「資產還原靚靚拳」，認為揸現金比資產更好。面臨環球央行展開利率正常化，歷年推高哂嘅資產價格，最怕突然逆轉下滑。富貴姨婆經歷過亞洲金融風暴及金融海嘯，更不會迷信香港樓價只升不跌，寧及早沽貨轉揸現金，總好過跌市來臨卻走唔甩。
FB page：http://fb.com/seeforcaptain/
Captain Cool
經濟客艙 - Captain Cool 舊文
來源 source: http://hk.finance.appledaily.com
