智取大市：三大關鍵事發酵
■中興被禁，科技戰正式浮上面。資料圖片
星期日經過雜貨舖，睇舖大叔大大聲咁講，「你睇好多股份已經進入熊市啦，你仲諗住買」。從恒指、騰訊（700）技術走勢，加上消息面又貿易戰、又科技戰、又打仗，衰到冇人有，牌面嗰種差，普羅大眾都輕易睇得出。難怪大家睇到咁淡，皆
因恒指3萬點確實唔平，但面對貿易戰、科技戰殺到埋身，換轉一年前聽返𠵱家嘅新聞，可能會以為聽錯，「3萬點？乜唔係2萬點咩？」
不過，啱啱有3單關鍵新聞值得關注，第一，中興被禁，科技戰正式浮上面。第二，傳聞阿里巴巴、百度、京東趕住6月返A股上市，不惜要求公司賣舊股加快進程，如傳聞屬實，就知中國要喺科技股資本市場上拎返少少定價能力，有幾咁重要。大規模資本活動在即，市場氣氛十分重要，好戲在後頭。第三，降準，中美開拖之餘，要維護金融市場穩定，放水亦在所不惜，壓抑通脹已成次級任務，降準最受惠似乎並非內銀，亦未必係行情稍為冷卻嘅內房，而係通脹概念，未必係資金避險咁簡單。聯儲局目前仲係死口話今年要加足3至4次息，如果美國因為撩事鬥非而生怕影響經濟展望同消費信心，話唔定加息進度亦要減慢，呢個算盤，亦要計算喺未來幾個月市況之內。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com
