降準減壓
2018年04月18日
美股前晚造好，但港股照跌，最直接原因係港元持續弱勢，金管局不斷入市買港元，反映資金陸續流出，市場見到咁情況，自然食少多教訓，謀定而後動，咁個市承接自然唔夠力，港股跌252點，地產股和內銀股差啲。晚上就傳來人民銀行降準的消息，令夜期抽番高百幾點。
人行係傍晚公佈，為引導金融機構加大對小微企業的支持力度，增加銀行體系資金的穩定性，優化流動性結構，從2018年4月25日起，下調大型商業銀行、股份制商業銀行、城市商業銀行、非縣域農村商業銀行、外資銀行人民幣存款準備金率1個百分點。同日，上述銀行將各自按照「先借先還」的順序，使用降准釋放的資金償還其所借央行的中期借貸便利(MLF)，以2018年一季度末資料估算，操作當日償還MLF約9000億元，同時釋放增量資金約4000億元，大部份增量資金釋放給了城商行和非縣域農商行。
港元流出較預期稍快
人行呢個做法，唔排除係應對中美貿易對內地經濟帶來不穩定性的壓力。呢排宏觀環境消息不斷，對市場時好時淡，內地股市更遇上放寬存款利率消息，更加淡啲，上證綜指昨日跌1.4%，跌幅大過港股的0.8%。
人行公佈降準前，市場焦點係金管局呢排不斷係港元跌至弱方保證時沽美元、買港元，在昨日下午倫敦交易時段，港匯再度觸及7.85弱方兌換保證，金管局近一星期內第七度入市，累計入市金額達223.97億元，按照現時情況，唔排除係紐約時段，會再有港元沽盤。
係市場不斷沽美元下，本港銀行體系結餘將於本周四跌至1574.55億元，因此同業拆息持續上揚，與供樓按息相關的1個月香港銀行同業拆息(HIBOR)續升至0.8929厘，連升3個交易日；隔夜息升至0.1979厘。長息方面，半年期報1.593厘；1年期報2.1066厘，再創2008年12月以來最高，咁即係話加息步伐又再行近一點，而且速度可能比想像快啲。
港元有沽盤，惹起市場關注，仲引起咗金管局兩位新舊總裁的咪高峰口水戰。前金管局總裁任志剛日前話，港元匯價弱，金管局可以主動入市吸資，咁樣就可以推高息率，理順兩者存在的息差。O依家由陳德霖做總裁打骰的金管局好快就回應，話金管局主動入市拉高息口，就會干擾咗機制運作，一旦托高息口，咁資金可能停止流出，未必可以達到預期理順息差的效果，所以會維持係觸及弱方保證先買港元的做法。
簡言之，陳總做法係按機制辦事，呢個做法一動不如一靜，等市場按照預期做，少咗主動出擊惹來批評的機會。呢個做法亦可以理解，陳總歡迎本地利率上調自然上調，但唔想人為托高利息。
有中環茶友問，港美息差存在一段時間，點解呢排先至走呢？牌面解釋，係美國三月加過息，令息差出現臨界點，觸發部份資金出走；再者，係部份熱錢可能覺得香港無乜特別機會，咁不如買番美元去其他地方搵機會，所以息口亦唔係唯一因素，因為如果香港有嘢炒，泊啲係度蝕些少息，成本其實有限啫。從呢個角度講，可以理解為部份資金唔特別睇好本地短期投資環境。O依家中美打緊貿易戰，市況有啲唔穩定，個市又累積升咗唔少，暫時唔係大手掃貨的時候，咁啲錢去其他地方走番兩轉都好正常。
中美兩個大隻佬拗手瓜未停手，恒指最低見過30012，收報30062，跌252點，4連跌累積下挫834點。美國商務部禁止美國企業向中興通訊(736) 出售零件，為期7年，中興通訊還要面對美國當局的3億美元罰款。消息拖累同類股份股價，瑞聲科技(2018) 曾大插見133.6元，收報134.2元，仍跌4.6%。舜宇光學(2382) 低見145.8元，收報147元，跌5.8%。丘鈦科技(1478) 跌4.3%，收報10.68元；比亞迪電子(285) 跌6.4%，收報12.36元。
大戶掟散騰訊血肉長城
另一個不利消息係內地加強審查網絡遊戲，騰訊股價下午應聲跌穿400元大關，散戶「血肉長城」崩潰後，最低曾見395元，收市報397.2元，不論是收市價抑或交易時段低位，均創今年新低，單計騰訊已拖低恒指41點。騰訊南非大股東減持時，陸羽仁提醒此舉雖然對公司長遠發展無明顯影響，但係佢點都沽咗成千億元貨出街，呢筆錢大股東絕對唔會買番騰訊，同時餵咗唔少貨畀想接貨的基金，影響咗股份供求。
陸羽仁
金融High Tea 舊文
來源 source: http://hdfin.stheadline.com
