利字當頭：銀行業都要考DSE？
■政府立法強制打工仔將血汗錢儲落「強迫金」。資料圖片
以下係一個朋友真人真事的經歷：「有次諗住去銀行買幾萬蚊基金，當儲錢退休啦。點知填完份風險問卷，發現我嘅風險類別唔夠班買隻基金，要另外再聽個銀行職員解釋免責聲明，然後又聽成十幾分鐘聲帶講風險披露……
之後，我就走咗。」
買基金嘅經歷，變成好似考DSE；唯一分別係，考DSE可以話年年都有驚喜。假如問我香港哋有乜比資本主義更根深蒂固，我一定會話係：「形式主義。」
正如DSE考出高分低能，銀行頭盔式銷售過程，結果亦只會令客戶走去抽1716；留意番，4月18日毛記葵湧單日升七毫，報收三個三。
老實講，雷曼事件令香港金融界有創傷後遺症，但其實去到金融海嘯震央嘅花旗國，銀行直頭變成監管機構嘅提款機，得閒就罰幾十億美金。好似最近業績報喜嘅美銀，由2011到2014年，幾乎年年都要為Countrywide賠錢畀Fannie同Freddie呢兩個共犯；更諷刺係，Countrywide出售嘅次按，大多數係2004到2008年，而美銀就2008年先至收購Countrywide。
賠錢，已經銀行界係「營商成本」一部份，而「唔做你生意」，更加係控制成本最直接嘅方法，亦多得偉大監管機構嘅努力，銀行業務俾唔少非銀行所佔領；例如美國嘅銀行按揭，好多被好似Quicken之類嘅網上財仔搶去。結果，消費者風險有冇降低呢？大家心照啦。
我唔係話乜都自由市場唔監管，不過形式主義嘅監管，真係有用咩？有位智者曾經講過：「立法禁止蠢人擁有財產吖，笨。咁咪唔會有人俾人呃囉！」
其實你估政府高官心底裏個句唔係咁諗咩？當然，佢哋唔會立法禁止蠢人擁有財產，但係佢哋會立法強制打工仔將血汗錢儲落「強迫金」；基金佬，自然唔跑回報又唔志在銀行前線推銷，就係咁，得咗。
利世民
http://fb.com/leesimon.hk
本欄逢周二、四刊出
利世民
利字當頭 - 利世民 舊文
來源 source: http://hk.finance.appledaily.com
