一路一帶：學會說不的強國
■中國社會其中一個特色，就係唔容許人民說不。資料圖片
一場晶片（大陸叫芯片）風波，掀起中美貿易戰另一次高潮，國內叫強化科研，推動研發創新及科技之聲此起彼落，不過中國呢個監控維穩到底嘅社會，從不容納反對聲音嘅文化，又點能夠造出頂級晶片呢，又點能夠造出傲視全球嘅
產品呢，中國其實何止落後美國60年？
大陸機遇萬千，平心而論，賺錢機會目前是全世界最多的地方，但賺錢同吸引人搵錢嘅人，唔代表你國力強勁，唔代表你文化及科技等軟硬實力有保證。非權貴嘅大陸家庭，你問佢最想子女做咩工作？超過一半人會答你做公務員，入黨做官，踏上富貴榮華之路，又點做研究，點樣創新？
中國社會另一特色，就係唔容許人民說不，唔准向領導說不，唔准向社會表達反向意見，就連娛樂都要管。一個唔識得反思，唔可以表達意見嘅社會，又點樣進步？研發晶片等，除咗同時間鬥快，仲要夠精準，錯誤唔可以大過0.1%，一班只懂得擦鞋嘅官員，事事奉唯，數據造假，晶片又點會「造真」？防坡堤嘅石壞咗唔認，鉛水管有毒唔認，連阿仔香港如是，何況是特色社會主義嘅中國？
筆者朋友近年經常將中國幾項頂尖事掛在嘴邊，一是中國高鐵技術世界第一，呢項筆者真係好難認同，去過日本搭鐵路嘅港人應該都知，日本鐵路、新幹線，準時度達到秒數，人家「沒落」及「迷失」廿年的日本，「高鐵」發展已經超過60年，都不敢自稱世界第一。但連一架汽車都造唔好，自己人都唔想買嘅中國製造車輛，竟然會造得出超過歐美嘅世界級列車，邏輯上真係講唔通。
中國列車、中國汽車，所有零件都是外國貨（唔好同我講中國組裝，組裝同技術無兩回事），唔好講林寶法拉利等超跑，你照你架Benz去砌，都唔會砌得出一架中國版賓馳。更加唔好講甚麼5G技術，筆者認為要講世界第一，《舌尖上的中國》才擺得上枱。
中國人才其實多於全球數倍，GDP等虛榮數字亦係全球之冠，呢十幾年靠加入世貿易攞盡貿易著數，但整個國家毫無誠信可言，護照免簽證嘅國家少得可憐；中國出到一個可以監控十幾億人嘅面部辨識系統，但一架車、一架飛機、一支火箭，甚至一罐奶粉都造唔出，自己人都唔肯Made in china，Live in china，要記住，有錢不代表萬能。
斯郎
https://fb.com/oneroadonebelt/
斯郎
~TITLE_S~一路一帶 - 斯郎 2018年4月26日 舊文
來源 source: http://hk.finance.appledaily.com
