智取大市：強力反彈等得過
■經歷周三大跌，市面上多咗人話港股步入熊市。 方家遠攝
經歷周三一跌，市面上多咗人話港股熊市，雖然港股黑期狂挾左一巴右一巴，但公道啲講句，估錯一日方向不足以論成敗。
就假設熊市講法成立吧，又點做好？目前熊市預期慢慢浮現，已證明市場情緒相對悲觀，就算係熊一亦已屆
中後段，但熊一反彈都可以相當驚人，由目前1浪悲觀去返2浪樂觀嘅過程，股價可能較現水平呈現具意義升幅，現階段執倉再hold幾個月，似乎比即時清倉可行。
點解悲觀極都有權大反彈？原因係歷史上嘅熊市，唔少會出現可觀嘅2浪。00年4月科網股爆破，恒指由18000點左右跌至14000樓下，科網股死曬，但恒指由14000樓下反彈到接近高位，升市改由紅籌股做主力，升勢仍相當驚人，證明執倉重要性。
恒指係咪已見頂，要視乎此輪跌市底部有幾低。以金融海嘯為例，恒指由32000點跌到22000，及後熊一反彈只能見26000點。的確，即使如有神助，恒指亦難急彈五成返去32000。2015年嘅直線跌市另作別論，但近幾個月指數咁Chok已幾乎排除出現2015年劇本，今次亦未似08咁差，08年恒指築成下降三角形再完成量度跌幅，而今期築成上升三角形，跌穿支持位但圖表冇咁差。眼下有CDR政治動力，反彈起點只在乎遲早。即使閣下估港股見熊，亦不妨冷靜等真正逃生窗出現。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com
