陸羽仁 BLOG 2018年4月6日
特朗普再大你
2018/04/06 08:24:29
網誌分類: 經濟
美國總統特朗普又玩嘢，正當市場認為中美雙方各自制裁對方500億美元貨品，雙方會回到談判桌上時，特朗普在香港時間今早突然話，責成貿易辦公室（USTR），考慮對中國1000億美元商品實施關稅，以報復中方無理的反制裁。
特朗普睇嚟不想被中國的500億美元報復措施大倒，如今要加注制裁1000億美元中國貨，佢在賭中國不敢跟注，就被美國大倒。這是一個「話事啤」遊戲，雙方不斷加注鬥大，誰人不敢跟，就認輸離場。但以我們習主席的風格，特朗普大中國1000億制裁，中國好可能也制裁1000億美國貨，不易退縮。
特朗普今早突然加注，美股場外期貨急跌，杜指期貨一度跌多過400點，後來跌幅略為收窄，在今早8:25分杜指期貨跌371點。回看在香港假期間，美股周三單早轉向，由跌轉升，杜指收升230點，單日波幅近800點。周四杜指再升240點，兩日累升470點，但以杜指期貨今早跌近400點計，抹去美國兩日大多數升幅。
今次中美貿易戰唔似咁快完。其實睇番歷史，美國針對中國啟動301調查，今次已經是第六次。1991年4月、1994年6月和1996年4月，都是針對中國知識產權領域；1991年10月針對中國市場准入問題，而2010年9月則針對中國清潔能源補貼問題。此前五次都是中國作出了讓步而未有正式打起貿易戰，而那時的美國總統亦無特朗普咁顛。
如今特朗普強硬，習主席亦硬，無以前咁順攤。中方先就美國對進口鋼鋁開徵關稅提出約涉及30億美元美國進口貨品徵稅，現在又公布會對500億美元美國進口貨品開徵報復性關稅。而且針對的美國貨品更係經過精心挑選。特朗普搞民粹主義，借打擊中國激起選民支持，為11月的美國中期選舉鋪路。中國就揀美國大豆和汽車業開刀，中國係美國大豆第一大出口市場，比重達到美國大豆62%，唔係美國某些官員所講的只係佔貿易總額的0.3%咁微不足道。更重要的是種大豆及生產汽車的幾個州，都係共和黨「票倉」，可以講係直擊特朗普的要害。
不過特朗普唔想失威，再要加注，呢場鬥大遊戲，雖然較難真係變成各自制裁數以千億美元貨品收場，因為雙方都要為此付出好大代價，但過程中雙方不斷出招，股市都會有好波動。想炒反彈，都可能要快進快出。
陸羽仁
回應總數
陸羽仁 BLOG 舊文
來源 source: http://blogcity.me
