放開利率 內銀憂受壓
2018年04月17日
市場仲係關注港匯弱勢，再觸及7.85弱方兌換水平，金管局再入市穩定港元匯價，買入35.87億港元，令周三(18日)銀行體系結餘下降至1665.13億港元。香港銀行同業拆息(Hibor)全線上升，財資市場公會資料顯示，與供樓按息相關的一個
月拆息續升至0.8546厘，連升兩個交易日。內銀昨日跌得較多，主要係人行透露，會開放利率，市場關注會否收窄銀行息差，令內銀股受壓。
擔心利率市場化壓低息差
人民銀行行長易綱日前在北京舉行的中國發展高層論壇表示，人行將推進匯率及利率市場化改革，有序開放存貸款利率管制，健全市場利率定價機制。野村發表研究報告話，貨幣政策正常化工作，長遠基準利率與市場利 率將統一。報告指，中國一眾銀行會朝着利率自由化環境發展，加上人行加強利率走廊，會對中型銀行有利，但佢同時都睇好大行如工行(1398) 。
市場擔心改革後利率跟市場走，會令息差收窄，對內銀股不利，A股亦顯著下跌。恒指收造30315點，跌492點；成交金額1076億元。國指受拖累跌229點，收報12031點。建行(939) 跌2.3%，收報7.98元；工行(1398) 跌2.4%，收報6.66元；消息有利中型行，一度急升的廣州農商行(1551) 股價反覆，收市升3%，報5.68元。
博鰲會議曲終人散，跟住就有唔少舉措宣佈，當中唔少仲係大動作。除咗喺會上宣佈中港股市互聯互通大增四倍額度外，國務院上周五正式宣佈，將海南發展為社會主義式的自由貿易港。消息公佈後，同海南有密切關係的航基控股(357) 開市就逆市上升，收升9.5%，收報11.28元。由於方案包括博彩業，御泰中彩(555) 股價飆升，大漲25%，收報0.053元，華彩控股(1371) 升8%，收報0.153元。海南將會搞跑馬，恐怕會對澳門賭業構成競爭，濠賭股調整，銀河娛樂(027) 急跌3%，報68.8元。
海南成立自由貿易港，係由國家主席習近平在慶祝海南建省辦經濟特區30周年大會親自公佈，當中指明四個戰略定位，成為改革開放重要窗口、試驗平台、開拓者以及實幹家，計劃將涵蓋旅遊、體育、免稅購物和醫療健康等領域利好政策。國務院上周六再發佈支持海南全面深化改革開放指導意見，支持在海南建設國家體育訓練南方基地和省級體育中心，支持打造國家體育旅遊示範區，探索發展競猜型體育彩票和大型國際賽事即開彩票，探索從空間規劃、土地供給和資源利用等方面，支持旅遊項目建設。
如果以上海自貿區為例，區內消費品可以免稅入口，又可以買美股、港股。中央揀海南成立貿易港，相信係因為海南屬於海島，自成一隅，管理上比較容易，開放範圍同程度應該可以仲大啲，故此連博彩業都有得諗。從中央角度，內地人消費力增高，成為世界各地旅遊、零售中心招手對象，既然係咁，點解中國唔搞一個旅遊消費中心畀自己呢？
航基湧高有機會回調
早前海南減免奢侈品關稅上作出嘗試，已經係測試水溫。海南氣候宜人，空氣清新，若然將來擴大稅務優惠，好似高昂醫療器材可以免稅進入區內，咁海南就可以發展醫療旅遊，女士要塑顏就唔使去韓國。至於海南搞博彩，以至擴大投資，可以行得幾快就要看具體落實速度，外界估計呢啲敏感領域，至少在初期都未必會郁得好快，對香港馬會、澳門博彩業即時未必會有衝擊。同樣，如果海南要搞金融投資，喺法律、人才上仲有好遠的路要走。中央拋出這個方案，講出來的主調係擴大開放，所以唔排除未來外商可以參與。
海南發展貿易港，對其他境外城市影響有待觀察，但對海南肯定係好事，因為O依家開放涉及範圍好廣泛，食到小小對當地經濟都有好大效益。方案公佈後，首先得益係在當地做機場的航基股份。航基過去幾年盈利都係四億元之間徘徊，現價市盈率9倍，息率有兩厘多啲，數字合理。正常嚟講，大家對海南有興趣，乜都未做都先要去睇睇，所以機場生意點都會受惠，若然未來人流不斷增加，咁佢商機仲陸續有來，但呢啲中長線利好因素要慢慢見效，股價衝高多數會回番一浸。
有人話，喺海南起家的海航系概念上都會受惠，因為資金供應問題近期要賣產減磅，等咗咁耐終於等到好消息。海南全島建設自貿試驗區和自貿港消息曝光後，高盛發表報告指，國務院指導意見沒有提及有關賭場或角子機立法問題。基於玩家對象不同，該行相信海南發展體育彩票及賽馬，對澳門賭收影響有限，惟濠賭股短期或較波動。
陸羽仁
金融High Tea 舊文
來源 source: http://hdfin.stheadline.com
