大茶飯 - 青冰 2018年5月14日
【大茶飯】摩指季檢潛質股（青冰）
今天是MSCI季檢的日子，但全球市場似乎只會集中留意納入A股的相關事宜，無他嘅，講咗一年，終於來到公佈成份股及落實細節的一天，5月31日收市後就正式生效，戰友們未必會因此有獲利機會，但其實唔好忘記，季檢都會在中國及香港指數加入新的股份，今次青冰就估下有咩潛質股。
中教控股(0839)於去年12月上市，招股價6.45元，上市首天已經破發，睇見都唔開胃，但上市至今的最低價，也是由當天做出，只此之後就大漲小回，上星期五創12.40元新高，累積升幅92%，半新股之中屬非常強勢。教育股在今年普遍表現極佳，上周都先後創出新高，而中教就係市值最大的教育股，月均成交量亦保有在5百萬股以上，所以有條件入摩。
榮威(3358)早過中教1個月上市，又係首日破發，仲要低收24%，12月跌至2.88元，較招股價低34%，認真得人驚。本業係水上休閒產品，係一間實業股，現時10倍市盈率，上市首份業績已經派息，好有誠意，不過成交就好疏，市值只有大概48億，喂青冰咁個賣點在那，就係個保薦人囉，摩根士丹利係其中之一，按青冰記憶，MSCI係好喜歡揀番大摩保薦的股份，雖然以市值計，只屬小型指數，但萬一成真，因為個成交量較低，個股價反應可能較大。
愛康醫療(1789)又係年底上市，比起上面兩位師兄，佢絕對有交代，因為首日已經升五成。主要業務係做骨科產品，仲可以用3D打印技術幫手添，作為醫療器械公司，又有少少生物科技feel，在今年都算係熱炒概念。由於市值較榮威更細，又冇親屬關係，相信只係冷門入摩股，但以未來前景而言，三股之中，青冰對佢更有信心，保薦人係高盛，通常都只會做大刁，呢隻細股能夠搵到佢操刀，值得尊重，最搞笑係保母對佢的投資評級，仍然只係中性，換言之日後仲有上調的空間。
MSCI季檢將在本港時間明天清晨才有結果，即使唔係以上三股都不需失望，只要新貴不是高開太多，開市跟進都仍有水位，戰友們可留意。Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com
