【實力取勝】驚就咪買 買就咪驚（陳承龍）（第178期）
2018-5-25 14:56:55
可能會話仲會爭吵，或者有機會解除協議，其實都幾無聊，喂大佬，乜嘢協議都有機會因為一方不滿而反枱，而嚟來次貿易戰爭吵，加上停戰協定、北韓、台灣、南海、俄羅斯制裁等爭議，都有可能隨時發生。咁講呀，股市評論員最好叫投資者永遠離場，做定期存款，咪鬼買股票，因為以上嘅嘢都有可能發生，唔買股票最安全，由得啲錢貶值，夠曬安全啦，好唔好？正如小弟成日講，驚就咪買，買就咪驚。
至於侵侵同金仔會面，仲無意思，因為今日話唔會面，下星期又可能話會見面，彈弓口改嚟改去，冇咩大不了。大家估唔估到侵侵諗乜？咪又係佢開天殺價嘅作風。
其實當個市被壞消息沽壓到冇曬生氣之時，計完風險同回報應該是有值博率嘅，歷史話畀我哋知，當人人恐懼之時，就可能要買貨。而巴克萊同渣打（2888）合併消息係咪真呢？如果係真，個市一定會估滙控（005）俾邊個併購，會唔會係工行（1398），或者摩根大通？
講宏觀嘢，又講下個股。細佬講過好多次，金誠控股（1462）自從易主後，已經今時唔同往日，隻嘢日前公布盈喜後，股價現好消息回吐，但三爬兩撥又掃返上去，反映資金趁低執平貨，短線大有機會升穿52周高位4.24元再上 。
金誠預期截至3月底止年度純利約1.6億元，按年升約433倍。主要因為同去年同期相比，投資及資產管理服務產生的收益大幅增加約49倍，其主因為管理的資產增加約91億元人民幣，以及管理的基金數目增加22隻；投資物業公平值錄得收益；及出售投資（包括可供出售投資以及持作交易的金融資產）的收益。
呢堆數字反映，金誠強勁除咗因為小弟大表讚嘆嘅「特色小鎮」搵到錢之外，佢哋管理嘅資產規模亦正急速增長，呢筆數真係好㩒計，勢頭仲好似仲有得爆上去。
金誠喺5月又公布，擬收購控股股東旗下浙江金觀誠基金銷售有限公司100%權益，進一步加強對該業務的發展。金誠可借此戰略，轉型做全方位財富管理同銷售嘅大型金融機構，而金誠收購嘅專業銷售團隊分銷理財產品價值，去年全年約為144億元人民幣，平均年增長率超過30%。重要係呢個收購仍未完成，即是舊年條數都book入金誠，一旦交易完成，價值144億元人民幣嘅理財產品將歸金誠管理，令金誠嘅資產管理業務繼續快速壯大，加上佢嘅特色小鎮模式發展項目陸續落成，唔買啲金誠看門口嘅話，會唔會走寶？
實力取勝 - 陳承龍 舊文
來源 source: http://www.winmoney.hk
