中環在線：樓神雷霆原來係雲格粉絲
■雷霆指雲格係佢偶像。
相信對於唔少英超阿仙奴球迷而言，領隊雲格宣佈退休，係一件幾震撼嘅事。人稱「樓神」嘅新地（016）副董事總經理雷霆原來支持阿仙奴廿幾年，雲格係佢偶像㖭呀。
雷霆噚日講完賣樓，閒聊兩句時講到雲格退休，佢自爆，支持阿仙奴好多年，雲
格一直係佢偶像。雷認為雲格唔單止領導一支球隊，仲要經營同平衡球隊營運，好唔簡單。
訪英必到阿聯酋球場
阿仙奴嘅阿聯酋球場係佢心目中最靚嘅球場，每次去親英國，佢都一定會去留低幾條腳毛，「次次都會去」咁話。
下月世界盃開鑼，全城盛事之餘，球迷就更加興奮，雖然今年主辦國俄羅斯播放賽事時間，唔少都係香港晚飯時間，不過亦有唔少係半夜。
雷霆講明一定唔會捱夜睇波，寧願錄起睇番。講到今年世界盃邊四隊有機會進入四強，雷霆認為西班牙球員相對較年輕，有機會晉級至四強之列。
工作忙碌睇戲減壓
平時工作忙碌，樓神嘅減壓之道除咗睇波之外，原來佢亦鍾意睇戲，樓神同唔少香港人一樣，都鍾意睇動作片。佢哋近期推銷旗下北角新盤海璿，基座商場好似亦計劃有迷你戲院，成件事構思中，不過成事機會都大，北角居民將來可能多一個地方消遣了。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
