科技股未來供應增
2018年05月02日
五一黃金周前，港股大升527點，到外圍美股低收，科技股維持弱勢。與中環茶友談起，呢排市場似乎有啲轉向，新經濟股波動向下，呈現弱勢，反而舊經濟股有點炒作，呢個現象，可能同科技股供求將來可能出現改變有關。
舊經濟股呢排走勢好過新經濟科技股，好似
隻九倉置業(1997) 近期股價向好，假期前一度突破一年新高，高見59.5元，全日升3%，收報59元，雖然佢係收租股，但由於唔少樓面都係做商場，而且租金模式有相當一部份係分帳，所以好多人當佢半隻零售股，所以炒吓黃金周概念。陸羽仁昨日行海港城都見到人頭湧湧，遊客好多，名店門口再現人龍，九倉豬籠入水。
另一隻零售股穩膽莎莎(178) 之前搶高，近假期反而有啲調整，但都接近5.04元一年新高位。莎莎O依家市盈率炒到44倍，逐步反映佢盈利復甦的利好因素。
小米長和行埋造勢
相對零售呢類舊經濟股，科技股呢排表現無左強勢，呢個表現主要係跟隨外圍科技股去行。美國科技股業績公佈出來不俗，但市場有啲擔心呢個係美國減稅產生刺激，加上科網類別公司，暫時未見有好大新浪潮再推動盈利，喺市盈率已經幾高下，股價唔容易谷上去。如果外圍科技股無運行，咁香港科技股必然受壓。
外圍因素外，仲有樣本地因素要留意，就係五月份起，講左好耐的同股不同權基本上會實施。初步聽到，內地智能手機製造商小米會喺勞動節後遞交上市申請，集資最少100億美元，公司最快可於六月底至七月初上市，成為本港首家同股不同權公司。
市場估計，小米估值介乎600億至1000億美元。呢個數目同騰訊(700) 的3.7萬億港元仲相差好遠，但如果以集資額計，都相當唔細。有外資估計，小米上市會吸乾香港投資科技股的水。
另外睇番將於周五(5月4日)掛牌的平安好醫生(1833) ，錄得近1500億元孖展認購，超額認購約270倍。平安好醫生成個超額都係1500億元，中間有相當部份係銀行借返嚟的孖展，小米如果上市都話抽水780億元，所產生效果係科技股供應增加，買科技股資金減少。
喺未上市前，小米會同長和(001) 宣佈合組全球策略聯盟，消息會喺周四(5月3日)舉行記者會公佈。
科技半新股破底有因
小米來港掛牌，有可能只係先頭部隊，另一隻大嘢係馬雲旗下的螞蟻金服。螞蟻金服月前透過發行新股籌資高達50億美元，當時該公司估值超過1000億美元，此舉朝未來IPO更邁進一步。如果佢上市之時，加埋新經濟金融概念，市值應該仲會多過小米。
同股不同權落實，對港股長遠係好事，短期就好可能令科技股供應迅速增多。以前北水來港，係想買啲內地買唔到的科技股好似騰訊，所以資金源源不斷追捧，未來選擇會增加下，呢個或者解釋到點解長揸不賣的騰訊南非大股東終於喺之前減持，以及點解好多科網半新股會破底。O依家掛牌的科技半新股好似都仲喺發展期，需要一段時間進入收成期，以前物以罕為貴，喺多左選擇下，估值就會下跌，股民無乜耐性，咁呢啲科技半新股就會淪為弱勢板塊。科網股來港吸水增加，未來可能令香港成為佢地集資中心，吸引更多資金流入，匯聚成為大海，但要做到呢個效果需要時間，喺未有新資金流入前，呢類股份或者會出現僧多粥少的情況，所以投資者買呢類股份，唔適宜太過倚靠過去一兩年經驗同眼光去睇，咁會稍為穩陣啲。
陸羽仁
金融High Tea 舊文
來源 source: http://hdfin.stheadline.com
