Money Walker：鼓勵港青廣州南置業
■馬時亨叫港青返內地住，大概只係誠實地將佢所認知嘅國家計劃講出。資料圖片
港鐵（066）主席馬時亨話喺高鐵廣州南站建香港城，鼓勵香港青年當地置業，可以解決本港房屋問題，港青可以廣州居住、香港返工。
如果廣州樓價平嘅程度足以
抵銷交通費，相信唔駛政府鼓勵都有大把港青自行咁做。畢竟來往香港市區與廣州南住宅區，一程只需馬時亨所講個多小時搞掂，車程其實同家住粉嶺上水，喺中環返工差不多。
不過認真一諗，人唔笑狗都吠。住粉嶺上水，出中環係坐地鐵，而住廣州去中環就要先坐程高鐵。問題係高鐵同地鐵係兩回事，講緊唔止票價，仲有班次。高鐵班次一定唔似地鐵咁幾分鐘一班，兩地通勤返工，連埋等車時間，一日來回差不多四粒鐘已屬合理估算，仲未計繁忙時間過關要大排長龍。如果OT或放工後有應酬就更大鑊，事關夜車班次只會更疏落。
澳門關閘同珠海拱北相連，由拱北去關閘只需步行過關，加上兩地24小時通關，唔少澳門人眼見珠海樓價平澳門一截，早已實行呢種居住與工作分隔兩地嘅模式。兩地通勤，並非一句「走去廣州南買樓，就等於住在美國Connecticut，前往紐約上班一樣。」咁簡單。
其實所謂大灣區概念，說穿了其中一個目的就係將區內所有人口融合，為2047年後香港成為中國一部份鋪路。馬時亨叫港青返內地住，大概只係誠實地將佢所認知嘅國家計劃講出。可惜唔駛坐港鐵返工嘅佢，只需知道如何鼓勵市民配合國家，而唔需要真正理解，交通同住屋問題如何主宰小市民嘅人生。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.finance.appledaily.com
