中環在線：小米35歲高富帥CFO搶fo
■新加坡籍的周受資曾為空軍效力。
國產智能手機生產商小米（1810）正式啟動上市計劃，創辦人雷軍亦終於現身香港，噚日來港主持投資者推介會，但佢呢日對傳媒三緘其口，只係hi同bye，可能諗住有嘢留番星期六記者會先講啩。不過，佢身邊有位仁兄其實比
佢更搶鏡，就係35歲青靚白淨嘅首席財務官（CFO）周受資。
上市後隨時多幾億身家
呢位有幾分明星相嘅周受資，今年35歲，履歷相當唔錯，擁有倫敦大學學院經濟理學士與哈佛商學院工商管理碩士學位，2015年加入小米之前，曾於美資大行高盛同DST Investment任職，稱得上係高富帥。根據資料，佢係新加坡籍，有兩、三年喺空軍工作㖭呀。不過，噚日見佢左手無名指戴上介指，似乎已婚了。
CFO除咗靚仔，亦好受雷軍重用，今年4月雷軍就升佢做埋高級副總裁，期望佢喺投資、財務同人事各方面都發揮更大作用。噚日佢都陪實雷軍入場主持投資者推介會。
再睇小米嘅初步招股書，超過7,000名員工獲發認股權，共有22億認股權未行使，其中一成畀咗10名高層，獲最多5,000萬認股權嘅，分別就係周受資與高級副總裁（電視業務）王川。若小米成功上市，以招股價下限17元計，周生隨時添幾億身家。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
