阿爺部署降準
2018年06月22日
美股急插後回穩，但香港明顯「弱雞」，彈得少跌得多，主要係內地股市升咗一日後再跌過。上證指數插穿3000點後，形勢開始吃緊，昨日跌1.4%，拖累港股都有相若跌幅。
國務院放出信號
中美繼續打貿易口水戰，但美股抵抗力明顯強過內地好
多，納斯達克指數仲創新高，但A股就唔係咁靚仔，周三回升力度唔係好夠，跟住昨日再跌過，上證指數收報2875點，跌39點；深成指數收報9316點，下滑184點。由於內地股市腳軟，港股本來開市跟住美股造好，下午掉頭回落。
美國科技股前晚喺併購消息下造好，連帶喺美國上市的阿里巴巴都有得升。美股咁強，搞到內地官媒好似有啲眼紅。內地《環球時報》英文版警告，若美國總統特朗普加劇與中國貿易緊張關係，中方唔排除會針對美國杜指上市巨擘反擊。北京係咪會咁做未知，但好明顯喺香港掛牌的內地龍頭科網股騰訊(700) ，就跟唔上美國同行走勢，再度失守400元關口，跌0.85%，收報396.8元，叫做跑贏大市。雖然騰訊跌幅唔算好大，但再證明佢比外圍科網股走勢落後。喺呢個環境下，小米準備下個星期招股，對市況同其他科網股都有可能帶來壓力，小米隨時有可能俾人壓價。
美國對中國步步進逼，令內地股市氣氛低迷，甚至擔心會影響企業投資。有報道話，國務院總理李克強周三主持召開國務院常務會議，部署進一步緩解小微企業融資難、融資貴，持續推動實體經濟降成本。會上特別提到運用「定向降準」等貨幣政策工具，增強小微信貸供給能力，呢個消息被理解為畀出咗一個明確降準信號。
貿易不明朗對股市同經濟陰影日益加重，美國聯邦儲備局主席鮑威爾喺公開場合都提到全球貿易摩擦，會影響企業投資，暗示對增長有影響，呢個說法聽落都有啲鴿味。白宮現時四出攻伐，由於美國主動出手，美股所受影響相對細啲，但美國央行行長語氣都軟咗，所以歐洲早前講明，要到明年中打後才可能加息，內地睇嚟更加有可能提早降準。
港股要睇內地市，內地市要睇阿爺，若然阿爺出招唔快，內地市止唔到血，仲會拖低港股。
碧桂園服務趁弱市收集
指數大插，藍籌基本上都受壓，較為熱鬧的反而係介紹上市的碧桂園服務(6098) ，昨日佢逆市升咗16%收10.46元。碧桂園服務係由碧桂園(2007) 分拆出嚟，究竟佢值幾多錢好難估。過去物業管理公司上市，全部都有炒作，所以喺碧桂園上市前，呢個板塊好多股份都偷步炒上。資料顯示，公司今年四月合同管理總面積，已擴大到約3.654億平方米，覆蓋超過中國28個省、市及自治區的260多個城市。
碧桂園分拆並以介紹方式，將旗下物業公司碧桂園服務主板上市，以實物方式，向股東合共分派碧桂園服務25億股股份。以佢昨日收市市值最高達到26億元，登上港股物業服務板塊第一位置。
睇番碧桂園係持8.7股，先獲發一股碧桂園服務，所以應該都有唔少碎股。過去呢啲股份登場，有時要經一段時間收集，好似中海物業(2669) 分拆掛牌時，試過炒上後大幅倒插，收集咗成半年先炒上創新高，真正展現高潮，所以有興趣買內房物管股者，可趁跌市伺機收吓貨。
陸羽仁
金融High Tea 舊文
來源 source: http://hdfin.stheadline.com
