智取大市：咪睇小人氣新股
■小米上市初期未必有好表現，但日後發展值得留意。圖為小米創辦人雷軍。資料圖片
人氣新股上市後係咁跌，唔一定代表公司質素有問題。叫得人氣，上市當時嘅市況或許好到冇人有，於是容許招股價瘋狂Overvalue，50、60倍PE當然唔係隻隻股能夠駕馭，股價上完市唔散
水至奇。不過，只要打後幾年時間保持增長，消化咗Overvalue同蟹貨後，股價總有機會捱出頭。2013年12月上市嘅福壽園（1448），捱到今時今日卒之連環破頂，已屬一例。今日嘅閱文（772），話唔定過多兩三年增長之後，估值變返合理，就能夠再成為明星股，呢啲有niche嘅股，總要繼續睇落去。
新股唔少時候係上市搵人笨，唔係敗絮其中就係貴到飛起，但貴到飛起嘅新股，搵你笨一時，未必搵你笨一世，只要佢本質唔係壞。如果有咗上市後增長track record，他朝炒起上嚟更加如狼似虎，呢類股不能睇小。尤其稍後會有更多同股不同權、生物科技公司嚟香港上市，呢批股份相信唔平得去邊，但總會有寶藏。
小米（1810）預測市盈率成至少40倍起跳，睇完佢嘅盈利增長能力之後，加上佢嘅過去有唔少負面新聞，或許會令大家失去興趣。小米上市初期未必有好表現，但佢發展低價智能產品市場定位確實不錯，就已經有值得繼續留意之處了。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com
