港機有好嘢
2018年06月12日
港股上周五大插逾五百點後，趁住外圍冇乜嘢反彈，恒指昨日回升約百點，暫時睇彈力未算好強。
一個月拆息逼近1.5厘
美朝兩國領袖喺新加坡做大龍鳳，暫時未有乜高潮。要留意嘅喺，今個禮拜美國議息，本地息口持續扯高，一個月港元拆息進一步升近1.5厘，
連升10日，繼續是2008年底以來近十年高位，用拆息計按揭利率人士負擔會略為增加。
議息前大市觀望氣氛濃厚，成交好奀豬。恒指收報31063點，漲105點；國企指數收報12172點，升6點，全日交投只有774億元。同時「北水」繼續流走，南向滬港通淨流出5780萬元人民幣，至於南向深港通則淨流入1.94億元。萬洲(288) 遭瑞信降級兼削目標價，股價逆市跌5.6%，收報7.44元，為跌幅最大藍籌股。內地五月汽車銷量按年增9.6%，消息刺激汽車股向好，吉利(175) 升3%，收報24.3元，為升幅最大藍籌股。
投資者眼前心態係唔做唔錯，不過大公司就趁呢啲氣氛出手。太古大股東施懷雅家族第六代成員、非執董施銘倫(Merlin Bingham Swire)下個月上場，未上場即有動作，宣佈買起港機工程(044) 25%少數股權，將公司私有化。由於作價比上周五收市價44元溢價約64%，市場相信成事機會好高。對資產千億計的太古嚟講，呢個只係小菜一碟，但都俾人佢有嘢搞的感覺。港機工程昨日收報68.1元，升左55%。太古A(019) 收報82.45元，跌1%。
港機工程主要係做圍內生意，替太古維修飛機。呢次私有化理由係簡化集團架構，同時唔使再為一間咁細的公司維持上市地位，做咁多繁文縟節。中環茶友相信呢個都係理由之一，除此之外，估計港機都有唔少資產，以成間公司百零億計，O依家都買唔到乜嘢，但就有一盤獨家生意，兼且有唔少資產，計落肯定超值。
港機主要喺香港經營飛機維修，喺廈門同香港都有唔少廠房。去年集團出現虧損，正係趁機私有化時間。太古一向出手得體，呢次以高溢價豪俾小股東，相信大家都會接受。雖然話港機有資產，但呢啲嘢唔郁就係唔郁，O依家有機會高價套現，小股東若然睇好，可以買翻太古，一樣都係大件夾抵食。
私有化之後做少好多公文手續，而且有乜大計就唔使麻煩，直情可以內部拍板。過往好多工業公司廠房，都係財團搵地來源，太古用船塢地、漆廠地起過唔少樓，其他好似港燈、中電、和黃等，都一樣用廠地起樓。港機喺香港地皮唔係咁多，但中港兩地地價O依家咁驕人，係咁意搵到一兩幅都回本有凸啦，所以交易長遠對太古應該有利。
大班換人動作漸多
下個月太古大班正式換人，成為近年首次由家族成員坐呢個位。呢排有傳太地放售太古城中心，又私有化港機，似乎動作多左。太古股價呢個月開始陰陰哋升，雖然升勢慢，但就扭轉過去兩年弱勢。市場可能覺得管理層會將難題處理得差唔多，再由新大班開始新時代，所以上定車等睇戲。
港機搶鏡外，同樣有動作的天津津燃公用(1265) 內資股易手，股價急漲66%，收報1.03元。碧桂園(2007) 分拆的碧桂園服務(6098) 下周上市，物業管理股有炒作。彩生活(1778) 升7%，收報7.93元；中海物業(2669) 升4%，收報2.95元。教育股繼續受追捧，宇華教育(6169) 升3.3%，收報5.7元；民生教育(1569) 升2.9%，收報2.16元。
陸羽仁
金融High Tea 舊文
來源 source: http://hdfin.stheadline.com
