大棋局：降準調控就快玩完
■人行周日宣佈降準。
調控存款準備金率係一種落後制度。美國貨幣政策70年代後經歷過McCallum Rule同Taylor rule洗禮，前者控量，後者控價，此後先進國家嘅金融體系以控價為主，控唔到價先會控量，如QE。調控存款準備金率呢種
做法之所以落後，因係控量，透過舞上舞落存款準備金率，去增減市場上的基礎貨幣。
美國都有準備金要求（Reserve Requirements），根據銀碼不同，比率不同，最高為10%。但美國要調控市場上嘅基礎貨幣，好少鬱準備金要求，而係鬱額外存款利率。銀行扣除準備金要求後仍有閒錢，有時會存入FED。所謂有時，即係唔一定。咁存定唔存？就睇有冇著數。
美國實施QE後怕洪水失控，實行額外存款利率，目的係畀銀行自己揀：要拎錢出街放數，定存入FED到食息？邊樣有著數就做邊樣，然後聯儲局藉由觀察銀行嘅動態，去估市場究竟要幾多流動性，拆借恢復正常未，利率要咩價。呢種手法之所以比較高，因為佢尚算尊重市場，按市場去微調。落後國家相反，樣樣事話之你，會夾硬嚟。
漸用利率走廊取代
中國要改革，調控存款準備金率遲早會淘汰。1999年至2007年，中國存款準備金率6至9%（當時大中小金融機構準備金率一致）；2008年前14.5%；現時15.5%（中小金融機構13.5%）。淘汰前會降到幾多？跟美國的話可能10%左右。
近年中國嘗試用唔同方法逐漸取代調控存款準備金率，其中利率走廊就係想模仿美國（詳見舊文《2015大時代（二）》。
利率走廊為利率設一頂一底，讓市場利率在走廊內遊走。中國想將SLF利率作為利率走廊上限。用一個簡單講法，SLF類似貼窗，為銀行唔夠錢時同央行借錢的渠道。正路情況下，銀行應該喺市場上向同業借，非必要唔會同央行借。除非原因有二，一係市場利息貴過央行，一係銀行同業唔肯借。內地嘅諗法係：當SLF利率作為利率上限，市場拆息貴過SLF利率，銀行會同央行借，市場拆息就會回落。而利率走廊下限，便學聯儲局原意，以超額存款準備金利率為底。
計劃行唔行得通？以香港為例，貼現窗係虛嘅，因銀行要用到貼現窗，往往會被視為唔掂，絕少用。但內地國情不同，由於內地放棄了自由市場，將權力交託於中央，所以凡出任何事，會認為由中央打救係理所當然。
故此SLF雖然向央行借錢，也會被視為一種很正常的融資渠道。今個星期內地有6,700億元人民幣逆回購到期，降準選擇7月5日實行，係防貿易戰講唔掂數。
Mr. Tregunter
本欄逢周二刊出
Mr. Tregunter
大棋局 - Mr. Tregunter 舊文
來源 source: http://hk.finance.appledaily.com
