中環在線：「領事股神」睇淡股市放暑假
■詹劍崙𠵱家連藍籌股都沽清咁滯，小米都唔抽。
近期股市chok嚟chok去，股民心血少啲都唔掂，但以炒細價股響朵、有「領事股神」之稱嘅詹劍崙，呢幾個月竟然悠然自得，仲啱啱歐遊返嚟。
佢話早喺今年3、4月開始沽貨，莫講話細價股，家陣連藍籌股都冇乜
。佢預計呢兩個月股市都唔多掂，所以索性唔睇股，同屋企人出國玩，下個月又飛喇。佢估計至少要到9月先再睇返個市，對下半年大市都係睇淡多。
18萬投得靚錶贈老婆
佢話炒股呢家嘢，都係捉人心態，今年頭兩個月見投資者心態咁勇，所以喺嗰段時間狂抽新股，唔少都入咗頭槌飛，回報幾和味。不過家陣乜嘢股都唔玩嘞，連小米（1810）都無去抽。
講開又講，詹劍崙前晚喺香港股票分析師協會嘅晚宴上，以18萬投得Franck Muller名錶。據聞，當晚詹劍崙同金銀業貿易場理事長張德熙，係最積極舉手參與拍賣。
兩人舉到難分難解之際，張德熙見拍賣價去到18萬，覺得「實發實發」好意頭，就決定成人之美，於是詹劍崙成功以靚價投得心頭好，仲大曬恩愛咁同華華講，隻錶係送畀老婆Clara，「不過唔知佢鍾唔鍾意」。計華華話，一番心意，Clara一定like爆喇！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
