魚樂無窮：賭波又關炒股事
■馬會足智彩食水甚深，勝出率要到55%才能打和，六成始有錢贏。 資料圖片
侵侵又玩嘢，擬向2,000億美元中國貨加徵關稅，消息震散中港股市，恒指死守28000大關，形勢比人強，夾硬入場冇意思，少做少錯才是上策。
股市冇嘢好講，今日傾下波經。
世界盃進入最後直
路，本欄見報之時，決賽隊伍已順利誕生。今屆參加了本報舉辦的估波遊戲，每日推介一場亞洲盤，未計昨日英格蘭對克羅地亞，共估了22場波，錄得11勝1和10負成績，勝出率僅50%，同掟飛鏢一樣，絕對不值得驕傲。
眾所周知，馬會足智彩食水甚深，賠率低水同亞視一樣都係永恒，當然，人哋打正旗號做善事，落注唯有當惠澤社群。不過，從賭博角度出發，勝出率只得一半半，埋單一定會輸錢，粗略估計要到55%才能打和，六成始有錢贏，所以如果跟足本欄出擊，見紅機會甚高。
賭博賭博，賭其實只係博，所以千萬不要抱住追番所輸嘅心態落飛，均注入場才能分散風險，孤注一擲反敗為勝，只在王晶賭片系列才會出現。炒股票要畀經紀傭金、印花稅等使費，嚴格來說同賭波抽水無異。回應文首所指，如果市況唔就勉強去炒，只會輸得更慘。
唐牛
http://fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.finance.appledaily.com
