【實力取勝】新股大牛市（陳承龍）（第186期）
2018-7-19 16:41:57
萬眾期待嘅書展開波啦，為咗2018書展，其實都籌備咗成年，當然籌備同落手落腳做係兩回事啦。正大師由舊年書展完咗已經催我開筆，小弟本書雖然差唔多最後一刻先寫，但好多同事安排出版印刷、布置、物流、
贊助商禮品等等，都出咗好多力，小弟喺呢度首先多謝咁多位。
今年已經係《港股策略王》第三年參加香港書展，有咗上兩年經驗，得出結論係要「專攻財經書」，頭一兩年我哋都係出咗啲消閒讀物，反而令唔少fans失望。呢篇稿，係喺18號晚，即係書展第一日完咗之後寫嘅，今年我哋喺正路口位，接觸到更多讀者，我同阿正個老友馬太，第一日就衝嚟書展捧場，令到我感動。
依照往年慣例，周五六日都係我哋攤位最旺嘅幾日，記住1A C16，小弟陳承龍大部份時間都會喺度打躉等大家，一齊吹下水，講股票，睇下我嘅健身成果都好丫。
講返個市，世界盃之後反而更加靜，成交奀到得700億左右，好多戰友都停曬手，隔岸觀火，不過有個板塊係好炒得，就係新股。先唔講任何公司背景，阿正唔知係咪聽咗策略王直播室，條友仔喺米技國際（1715）上市後先買，貪隻嘢市值細，冇乜升過，點知阿正醒到做「格仔龍」低買高沽，啱啱喺書展同我講兩日走咗三轉，贏錢都唔請我食個車仔麵，真係好孤寒。
其實新股突然好炒，完全有跡可尋。隻基石控股（1592）0.4元招股價，首日上市大插3成，當好多人以為散水、大戶資金鏈斷裂之際，原來係大戶喺低位慢慢收貨，幾日後炒到上0.67元，高招股價67.5%，你話係咪大戶派錢畀大家？所以呢，同米技國際差唔多嘅FSM（1721）都要望多兩眼，隻嘢0.53元招股，最高上到0.69元，截稿日收0.57元，又係炒上炒落，似乎有大茶飯跟尾。你哋睇下隻興紡控股（1968），招股價1.12元，最高升到上3.3元，大市雖然係差，但反而造就新股大牛市，呢排要炒，一定炒新股咯。
實力取勝 - 陳承龍 舊文
來源 source: http://www.winmoney.hk
