智取大市：中央維穩搵鬼信
■人民幣近期弱勢。
港股回穩兩大因素係人民幣同美匯，如果市場對於人仔安危有所動搖嘅話，相比美匯上升令資金流逆轉，對股市威脅更大。市傳中央喺人仔6.7水平出手，人仔反彈兩日，之不過噚日執筆時已轉跌。
有一個壞訊號係，星期二人仔明明反彈，加上有中央出手嘅消息照住，
港股依然跌，二三線股當日仲要冇主動買盤肯撈底，以石藥（1093）為例，只要左手邊有人掛買，即刻有賣盤狂質，結果當日跌8%。股市冇因為利淡因素扭轉而反彈，本身就係一個更利淡嘅訊號。市場似乎唔信一單中央出手嘅小恩小惠就能夠扭轉大勢，於是有利好消息，掉返轉由高位跌唔多、有利潤在手嘅股就成為出貨對象。
去到噚日，恒指早段一度跌400點，當個個覺得死梗、絕望之際，又有買盤將期指掃高，恒指幾乎收復失地，但二三線股普遍未跟得上，收市跌幅仍然顯著。暫時睇，有好消息跌市時市寬差，指數即市反彈時，市寬一樣差，再講彈得起嘅係嚴重超賣股如航空股等等，成交未夠千億唔夠活躍，稍後情願見到跌市成交多，才更似打底。
呢個環境下，如何有乜風吹草動，投資者信心依然薄弱，容易再拋售。即使有膽量有實力去接向下嘅飛刀，最好見到把刀飛到咁上下，見佢冇得飛得再遠嘅時候先去接。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com
