周末打到嚟 收息預捱價
2018年07月06日
市場昨日話題除咗中美貿易戰徵稅埋牙外，大家講到嘖嘖稱奇嘅係海航董事長王健，喺法國旅遊時意外爬牆影相失足跌死，一位57歲千億產業嘅掌舵人咁樣死法，確實令人驚詫兼惋惜。
王健被視為海航領軍人物，佢喺海南島憑着1000萬元人民
幣起家，與主席陳峰被視為傳奇人物。近年海航因為旋風式收購備受注目，陸羽仁年前曾去過佢哋喺香港搞的酒會，幾乎所有大銀行高管都到齊。
最近一年，由於內地對資金在海外投資加強限制，海航被指負債偏高，開始出售境外物業，包括香港啟德四幅地皮中的三幅，由於海航收購資產質素唔差，加上全球經濟好景推升價格，佢哋出售嘅資產，基本上都能收回成本，甚至有利可圖。
內地回彈人仔回彈
據熟悉公司情況人士講，海航出售一輪資產後，基本上安全著陸，有人仲覺得中央限制海外投資，反而幫咗海航及時控制槓桿，避免O依家因為中美貿易戰引起的市場不明朗。諗唔到喺呢個局面稍定時，王健竟然喺旅遊時發生意外，O依家陳峰同其他高管已經趕咗去法國協助處理後事。王健翻牆影相翻出禍，只能講人生同市場一樣，往往係變幻莫測。
同樣變幻莫測嘅係中美貿易關係。上半年大市開局強勁，第二季指數因為貿戰急挫，結果期內強積金平均回報錄得虧損，富達國際亞洲機構業務(日本除外)投資策略董事簡立恆直言，難以估計下半年強積金回報表現。他預期爭端短期內難以解決，投資市場於下半年仍會波動。
美國向中國加徵關稅，中國以報復性措施企圖反制，雙方行動在7月6日落實。按日出時間計算，若然大家在同日徵稅，中國會先過美國實行，但內地表明不會先採取行動，看來係唔想予人中國先開槍的口實。但美國開槍後，中國都會開槍，呢個周末會打到嚟。中國是用以戰止戰策略，大家綁好安全帶。
人仔跌得多會反彈，昨日早段中間價就升415點子，創去年10月11日以來最大升幅。人民銀行參事盛松成表示，今年以來，人民幣兌美元匯率呈雙向波動，外界不應對人民幣貶值過份解讀，更不能認為是人行主動引導人民幣匯率貶值。中方官員言論溫和，港股中段雖然曾插逾400點，但午後跌幅收窄，恒指收報28182點，跌59點；國企指數收報10608點，下滑104點，成交金額934.29億元，大市似乎有暴風雨前夕嘅平靜。
藍籌股乏善足陳，有名人效應的新股梁志天設計(2262) 首掛，收報1.15元，較上市價0.88元，上升0.27元或30.68%，高低位分別為1.16元及0.91元，成交5.07億股，涉及金額5.28億元，不計手續費及佣金，一手3000股賺810元，都算係有驚喜表現。
大新孖寶逆市攀升
政治市中，大新金融(440) 同大新銀行(2356) 雙雙上升，喺呢啲市況下，佢咁郁法都算係異動。早前同屬金融股的國浩(053) 因為私有化逆市造好，小股東成為淡市贏家。大新金融出售咗保險業務，之前曾經大派紅利，股價大升近8%收市，大新銀行就收升4%。若以正常派息比率，兩隻股份大約有2.5厘左右，雖然唔算好高，但喺呢啲市況入市買股，必須有長線準備，短期隨時要捱價，所以揀股點都揀啲有息收的比較划算。
陸羽仁
金融High Tea 舊文
來源 source: http://hdfin.stheadline.com
