一路一帶：香港越來越荒謬
■梁國權作為港鐵掌陀人，鬧出沙中綫醜聞，竟然可以「提早退休」，令港人十分氣結。資料圖片
因為沙中綫醜聞，港鐵（066）終於有高層執包袱走人，工程總監黃唯銘要問責落台，非常合理，但作為CEO的梁國權，竟然可以「提早退休」，就令港人十分氣結。
梁國權由港鐵悉心培養
成為掌陀人，2002年加入成為財務總監，2012年成為副行政總裁，2015年3月正式成為行政總裁。有指周松崗2011年退休時，原本由梁國權上位，可惜當年八達通出賣客人事件，令到他上位的時間推遲咗4年。睇返年報，梁國權去年全年董事袍金連薪金，高達1,520萬元，另多年獲港鐵授股，年報顯示其持有122萬股港鐵，以收市價41.7元計，市值5,087萬元。梁國權擔任CEO三年所得的人工加埋股份，賺取收入近1億元，認真和味。
港鐵爆出咁多個車站出現結構問題，最新向政府交嘅報告仲要造假，港鐵一眾高層責無旁貸，但暫時未有負上任何刑責，港鐵作為公營機構，政府為大股東，梁國權其實都係大半個公僕，作出咁多危害公眾利益嘅事，都唔需要負上責任，香港嘅制度其實十分可笑。
再睇同樣作為公僕，民選議員梁國雄，被政府粗爆DQ，其間有盡議員職責上班開會，但竟然被立法會追收人工。梁國權賺過億但危害公眾安全，就安然袋錢退休，你話香港其實幾荒謬。
斯郎
http://fb.com/oneroadonebelt/
斯郎
一路一帶 - 斯郎 舊文
來源 source: http://hk.finance.appledaily.com
