魚樂無窮 - 唐牛 2018年8月9日
魚樂無窮：港鐵最後出路
■高鐵開通後與中國大陸接軌，港鐵找來內地高管睇場，變得理所當然。 資料圖片
港鐵（066）沙中綫工程事件越揭越臭，部份高層孭鑊落台，部份更高層有責任感地留低。有人問點解娥特首會挽留佢，直覺話畀我知，呢個燙手山芋，現階段肯定冇人會接，懸空職位卻更加麻煩，兩害取其輕之下，唯有硬食。
港鐵有獨大的鐵路業務，有如日方中的地產金蛋，更有香港政府做大股東，橫睇掂睇都係無敵的。但正因護城河太深太闊，致令營運不思進取，君不見壞車問題無日無之嗎？正是你有你鬧，佢有佢闊佬懶理。
唔少人希望今次爆大鑊，可令港鐵納入正軌，對此我不太樂觀，始終冰封三尺非一日之寒，如果炒幾個人可以改變企業文化，好多老闆都唔使頭痛了。
我更加相信，港鐵最終會走向國產化。有香港政府做後盾，大到不能倒卻又有生意自己送上門，管理層點解要搏命？高鐵開通後與中國大陸接軌，找來內地高管睇場，變得理所當然，講到呢度，我不期然諗起另一隻藍籌港交所（388）。
所以，即使股價昨跌近3%，我也完全冇意慾入場，當然股息率只有2.7厘也是提不起勁的原因。要揀穩陣的股票，我寧願要中電（002）、煤氣（003）、恒生（011）、領展（823），事實上，股價表現亦已說明了一切。
唐牛
http://fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.finance.appledaily.com
