港視網購突圍唔易
2018年08月31日
新興市場貨幣風暴未停。阿根廷經濟已經差咗一段時間，隨著資金撤出，阿根廷貨幣呢個星期明顯受壓，政府向國際貨幣基金會求救，期望可以加快提供美元貸款。阿根廷同印尼點解會喺呢個時間出現匯價危機，一大原因係美國九月會進一步加息，銀根再度收緊
，喺收水之下，影響最大自然係淺水區域，即刻變咗「塘底突」暴露出來。如果美息持續上調，新興市場危機仲會繼續。
1997年嘅亞洲金融危機，先係泰銖出事，跟住風暴一路吹咗成年，去到1998年5月香港政府入市到達高峰，當時香港同大鱷惡鬥，捱到俄羅斯貨幣暴挫，觸發美國對沖基金「長期資本」冧檔，美國減息救市先告一段落。由此可見，美息向上係風暴之源。
貨幣風吹 板塊輪跌
O依家美國總統特朗普打開口牌，叫聯儲局唔好加息，若然聯儲局肯聽佢話，咁新興市場就執番身彩。不過，特朗普做到咁出面，聯儲局就算想畀面，都要整色整水一輪，所以下個月加息機會仍高。至於未來加息機會係點就難估啲，如果共和黨中期選舉勝利，特朗普氣勢如虹，咁都唔排除儲局會側側膊收韁，12月唔加息。不過，呢啲已經係後話，股市係睇眼前三日，新興市場貨幣有壓力，A股又急挫1.1%，恒指喺連升三日後無力再上，收報28164點，跌252點；國指收報10967點，下跌115點，成交只有786億元。
大市繼續出現板塊輪跌，飲食股借住內需概念撐咗一輪，終於開始面對沽售。中期盈利倒退逾17%的周黑鴨(1458) 股價創新低，低見4.08元，收市瀉9%，報4.5元；康師傅(322) 五連跌，挫4.5%，收報14.18元；華潤啤酒(291) 跌3.3%，收報34元。其他內需股亦向下，波司登(3998) 挫5%，收報1.15元；江南布衣(3306) 下滑4.6%。另外重磅醫藥股再現沽壓，復星醫藥(2196) 挫4.6%，收報33.3元；藍籌新貴中生製藥(1177) 挫3.2%。
轉營網購的香港電視(1137) 公佈中期業績，港視雖然市值唔大，但可能因為老闆王維基有知名度，好多人對呢間公司有興趣，久唔久又有人炒吓。睇番港視上半年定單總商品交易額8.17億元，按年升80%，相當於去年全年交易額約76%。日均定單量8900張，平均定單值505元，按年分別升74.5%及2.9%，五月起日均定單量超過一萬張。
公司指，今年將大部份資源集中於吸納更多新客戶、拓展倉儲執頜及物流派送容量，令業務得以持續增長，預計第四季開始逐步增加毛利及佣金率，期望兩至三年內做到整體營運收支平衡。
送一張單要91元
雖然公司管理層發放樂觀估計，但上半年股東應佔虧損就有1.4億元，每股虧損17仙；不派息，2017年同期虧損9620萬元。港視去年二月斥資521萬元收購Groupon香港業務，搞到營業額大咗七、八成，但生意做多咁多，唔見搵多咗錢，虧損大幅增加，走勢相當唔靚仔，收購後做唔到有協同效應。
如果睇啲細數，公司其他營運開支由去年同期的2.48億元，增至3.36億元，當中44%的其他營運開支，是1.484億元的配送成本，較去年同期增加3970萬元，主要由於物流服務的員工人數增加，以應付期內定單量增長，以及在今年三月第一期自動化執貨及倉儲系統投入服務以前需要的額外外判服務。
粗略按上半年日均定單量8900張計，平均計每單運送成本差不多要91元，似乎搵順豐送就無咁貴。或者公司預期未來有增長，不如自行投資。
不過，咁樣亦都增加咗經營壓力，若然生意上唔到，平均成本減唔到下來，咁就長期負重磅嘞。總的來說，隻股唔係幾買得落手。
陸羽仁
金融High Tea 舊文
來源 source: http://hdfin.stheadline.com
