智取大市：網龍等變身之路 - 晉佳
網龍未來要成為增長股，一定要靠教育業務。 互聯網圖片
內地教育部出文件限制未成年人打機時間，限制遊戲審批總量，一眾遊戲股陪住騰訊（700）大跌，當然唔少得網龍（777）。網龍遊戲業務不被視為有增長概念，未來要成為增長股，一定講緊教育業務。
睇上期講到
網龍董事長劉德建嘅事跡，佢係一位眼光準、極具耐性嘅人物。教育業務成為佢一大賭注，搞足5年都未賺錢，每年一單海外收購，令分析員批評佢靠財技為教育業務賬目化妝，睇死佢目標2019年分拆教育業務一定搞唔掂，當然，睇進度的確難以如期分拆。
不過，去到今年上半年，網龍整體業績轉賺，教育業務仍然虧損1.58億人仔，但呢一part業務收入按年增長48%，毛利上升54.3%，由於近兩年海外收購項目本來冇利潤可言，可見毛利係爭取國際生意帶來嘅自然增長，表現已遠較市場預期為佳，相信賺錢模式喺未來一兩年內出現。
網龍績後用咗半小時令股價升超過兩成，其後兩日顯著下跌。眼見轉型在望，可見將來網龍慢慢會由股價長期向下潛嘅股，變返有能力向上遊嘅股。AI概念遲早熱炒，等入市時機要學劉德建咁，極具耐性先得。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com
