智取大市：習股市升跌模式 - 晉佳
習近平上場後，似乎建立了一套股市周期習性，先派餅，後清洗，再派餅，形成循環。 資料圖片
上周提到，中國經濟利益分餅排序係政治勢力、然後人民、再到企業。貿易戰令中國可分嘅餅減少，分餅排序較落後嘅企業自然要作出犧牲。
習近平上場後，似乎建立一套股市周期
習性。上場後兩次中港股升市中，政治勢力、人民同企業皆大歡喜各取所需，但派餅過後，無論2015年大時代，定係今年跌市，中央為清洗太平地，不惜出手隊冧股市，或打壓行業令股市衰多幾錢重。2015年斬兩融屬典型例子，今年則肅清板塊，教育、醫藥、手遊、燃氣，熱炒板塊逐一擊落。除行業之外，年初至今打海航、寶能，清洗動作到今日仍未停手，於是中港股繼續跌。
呢種模式有乜好？面對政治勢力先行的中國，先派餅滿足各方利益，令各行業發展免受阻，夠鐘才去槓桿，順手將問題環節撥亂反正，鋪平路又派餅，從而形成Z型發展模式。
習總上任至今，坐穩後按時序2014年開始派餅、2015年中開始清洗、2017年再派餅、2018年又再清洗，形成循環。向好嘅方面諗，中央去到𠵱家仍出手打壓行業，證明冇擔心爆煲，周期行之有效，未作改動。期望未來幾個月，清洗完，會見到新一輪派餅嘅開始。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com
