中海油等嫁皇帝女
2018年10月03日
美國同加拿大就貿易談判達成協議，美股大幅造好，杜指收升192點，但港股無力跟上，睇嚟內地放假，北水停流，淡友乘機偷襲，港股人升我唔升。
北水停工承接乏力
華爾街股市上日氣氛熱烈，美國同加拿大達成貿易協議，令美股大幅高開，收
市美股雖然升幅略為收窄，表現仍然相當好，杜指上日大升192點。喺咁嘅環境下，港股表現就唔係咁靚仔，大市一開已經無力，恒指低開72點，你唔信邪去追就瀨嘢啦，大市逐步向下，一級級咁下行，炒即日鮮者，一分神就唔見咗500點以上。
平保友邦跌勢急
如果要問點解呢吓突然急插？有中環茶友話，會唔會因為港息12年來首度上調，大家驚有手尾呢？牌面睇，美國加息後，人民幣呢兩日又再迫近6.9大關，美匯指數高企95點，誘使資金由新興市場流出，各新興市場貨幣又再面臨貶值壓力，但港息上周開始上調，若然要因為利息插，照計上周五應該開始大插，但當時跌幅唔係咁大，點解到放假後先至大跌呢？一個較為近磅的解釋，係今個禮拜為內地國慶假期，滬深港通暫停，要等到10月8日(下周一)先回復正常，內地炒友都要放假，加上互惠基金及ETF連續三個星期沽貨再撤走資金，淡友於是乘勢施襲，喺咁樣急跌下，期指一跌夾到尾，大多即日鮮好倉已夾死，被迫平倉。
最終恒指收報27126點，急插662點；國企指數收報10754點，跌263點，成交911億元，喺大跌市下交投唔算特別多，反映北水少咗影響市場承接力。藍籌股基本上凶多吉少，騰訊(700) 跌1.9%，收報317元；中國平安(2318) 急跌2.8%，收報77.3元；友邦保險(1299) 更挫3.4%，收報67.55元。中海油(883) 最叻，逆市漲0.9%，收報15.64元。公用股向下，未能發揮資金避難作用，中電(002) 跌1.31%，報90.45元；煤氣(003) 跌2.32%，報15.18元；港鐵(066) 跌0.97%，報40.8元；領展(823) 跌3.31%，報74.5元；長江基建(1038) 跌0.24%，報61.85元。小米(1810) 遭美國公司起訴侵犯四項專利，股價一度創上市後新低，曾低見14.8元，跌4.52%。
重災板塊係燃氣股，重慶計劃取消天然氣初裝費，市場擔心將擴至其他城市。新奧能源(2688) 曾見55.25元，創近八個月低位，全日急跌14%，報58.25元；中國燃氣(384) 大跌9%，報20.2元；華潤燃氣(1193) 插10%。
中海油逆市表現出色，多少受惠長和(001) 旗下加拿大石油公司赫斯基能源，全面收購佢有股份的油砂公司MEG Energy。呢個收購連負債的收購交易，總值為64億加元(約391.4億港元)。收購價為每股11加元或0.485股赫斯基股票，作價較MEG上周五收市價溢價37%。
MEG目前於多倫多交易所上市，其單一大股東中海油(883) 持股12.3%。此前MEG董事會拒絕收購談判，令赫斯基最終直接向MEG股東提出收購。有消息指，目前MEG董事會仍然拒絕贊成收購建議，但不表示其他股東不贊成。
花旗估計，乘着赫斯基能源收購，中海油有大好機會減低油砂業務比重。該行指出，基於加拿大油管產能有限，加國原油價格較美國WTI原油期貨價格有明顯折讓，加拿大西部油價每桶30.8美元(對比WTI油價為73.4美元)，令油砂產出疲弱。今次赫斯基能源提出垂直式收購，相信係想將加拿大西部原油行業價值最大化。由於油砂生產成本較貴，有人願意出好價，相信對中海油係好消息。
當赫斯基提出收購後，有評論立即關注集團同中海油關係，甚至形容今次係赫斯基想搶中海油嘴裏的肉。睇番交易背景，加拿大油砂產油成本較貴，在油價低企時難以運作。現在油價上番相對較高水平，赫斯基透過加注收購，期望可以加強一條龍式營運壓低成本。中海油在2012年上次油價高峰期時，以1000億元重錘出擊買入加國油公司尼克森(NEXEN)，之後在當地幾個油砂項目的效益曾受到質疑。現在有機會出售部份資產，而且作價不低，若然中海油不想出售，可以同MEG董事會意見一致，拒絕收購，但如果中海油想賣，咁就有善價而沽的機會。旗下投資變咗皇帝女，左睇右睇都唔覺得中海油有乜蝕底。
陸羽仁
金融High Tea 舊文
來源 source: http://hdfin.stheadline.com
