金手指：樓市見頂終極訊號 - 孫柏文
從未買過香港樓嘅立法會議員張超雄，終於都入市，呢個會唔會係樓市見頂終極訊號？
資料圖片
鬼佬有雲，資產泡沫見頂，唔會有人敲鐘提醒。不過，人類由所羅門王開始，多年嘅炒賣，確實係有啲市場見頂跡象，值得去參考。被外資行譽為「全球最泡沫化樓市」嘅香港，可
能真係出現終極見頂訊號。
係乜？孫柏文記得2000年初，睇《華爾街日報》，喺納指衝上最高位500點前左右，有篇報道話當時睇淡科技股多時嘅大鱷索羅斯，因佢隻基金嚴重跑輸對手，180度飄移，瞓身追買科技股。之後納指幾年內跌到落1100點，要15年後先再破頂。
殿堂級人士轉軚，由永遠唔信，到身體力行咁瞓身，往往就係最佳終極見頂訊號。咁香港樓市，又出現咗啲咩殿堂級人士轉軚，令我話見頂呢？周末，我見到友報報道，話從未買過香港樓嘅立法會議員張超雄，都終於入市。喺我心目中，張超雄同索羅斯都係殿堂級。雖然炒嘢級數唔同，不過論左，兩者如膠似漆。
現今花旗政權，狂吹撥亂反正之風。而對上廿年，美帝最錯、埋下最多地雷嘅政策，非「量化寬鬆」莫屬。𠵱家不斷收水，香港樓市真係有望見多年高位。除「量化寬鬆」重啟外，唯一變數，就係當偉大中央大規模印鈔，佢哋堵截錢流走之力，是否有效。當中央趕曬啲人用電子貨幣，可能真係印極都唔流走。呢場角力，會好有趣。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.finance.appledaily.com
