大台革命尚未成功
2018年10月09日
黃金周結束，阿爺趕喺A股重開前重手降準。雖然阿爺想放水浮球，仍然未能阻/股補跌，結果上證指數急降3.7%，港股中午雖然一度回穩，但午市沽壓再現，恒指創今年低位，股王騰訊(700) 跌破300元心理關口。
中央出手維穩，仍然無法
支撐A股，上證指數收報2716點，挫104點或3.7%；深成指數收報8060點，瀉340點或4.2%，主要係市場擔心內地經濟下行風險增加，打擊中國經濟增速。
騰訊穿300心理震撼大
市場提早吹北風，美國科技股呢排有沽壓，股王騰訊就算連續19個交易日回購，股價最終難逃跌穿300元關，以全日低位收市，收跌1.97%報299元，為去年七月以來首次，由475.72元高位計，累積跌幅逾37%，市值蒸發逾1.68萬億元。
中環茶友話，騰訊雖然持續回購，但金額有限，作用唔大，開始時反而仲畀散戶一個訊息，覺得股價抵買，但如果跟住入市，O依家都損手唔少。管理層強項係營運業務，公司股價有時係受大環境影響，管理層睇未必中，有時仲可能好心做壞事，所以解讀回購訊息，有時要考慮埋公司其他背景，好似騰訊弱勢有本身不利因素，再加埋大氣候，回購下變成愈買愈跌。
騰訊跌勢停唔到，對大市氣氛都幾大影響，加上降準後A股反而急挫收市。恒指高開已見全日高位，午市進一步擴大跌幅，低見26187點，創今年新低，收報26202點，跌370點；國企指數跌137點，收報10393點，成交金額965億元。黃金周訪港人數初步升幅不俗，九倉置業(1997) 逆市升1.46%，收報52.1元，為升幅最大藍籌股。
市場對內地消息反應偏向敏感，動輒就觸發沽壓。金九銀十賣樓銷售期，但傳出減價消息，內房股捱沽，碧桂園(2007) 借勢回調6.7%，收報9.05元；連收租比重大的金茂(817) 都挫6%；雅居樂(3383) 更創逾一年低，收跌4.7%，報10.16元。
賈躍亭反面拖低恒大健康
中國恒大透過旗下恒大健康(708) 入股賈躍亭的電動車公司Faraday Future(FF，法拉第未來)成為大股東，惟雙方最近出現糾紛，賈躍亭更向香港國際仲裁中心提出訴訟，疑有意將「白武士」恒大踢出局。恒大健康復牌後股價急挫，一度跌37%，低見6.66元，收報8.78元，跌16.4%，成交金額3.2億元。中國恒大(3333) 就隨內房板塊下跌6.3%，收報20.95元。
大市欠佳，個別股份就跌近今年低位，電視廣播(511) 喺假前宣佈裁員150人。裁員對打工仔嚟講係壞消息，但股價往往走在壞消息之前，大台瘦身已經傳咗一段時間，O依家落實理論上已經消化咗，但股價昨日仍跌逾3%，見咗今年低位。
大台早前宣佈業績，中期純利按年升18.3%至2.01億元，而且期內收入升10.4%，喺媒體經營艱難年代算係好難得，管理層仲預期全年繼續回升。當時陸羽仁曾同熟悉大台生意的知情人士研究吓公司前景。知情人士話，大台業績好轉，主要係OTT平台登記用戶持續增長，業績於期內更成功扭虧為盈。另外，合拍劇收益唔錯，令公司整體業績加強。最近公司的外購劇《延禧攻略》大收，所以都唔係一面倒只有壞消息。
至於增長未來能否持續，知情人士話OTT平台轉虧為盈，主要係投資機頂盒投資期完成，未來盈利能力除咗睇市場，仲要睇版權保護嘅環境。早前佢哋係澳洲贏咗維權官司，算係好的發展。至於合拍劇有利可圖，能否擴大戰線，就要睇產能係咪可以配合。
聽完知情人士講解，陸羽仁感覺係大台迎抗成個媒體大氣候轉變，能夠做到呢個成績已經唔錯，不過革命尚未成功，同志仍須努力。電視廣播現價市盈率38倍，息率有8.84厘。以前電視廣播係收息股，派息穩定，近年派息政策稍為波動。有時無息派，有時派高息，其中一個影響係經營狀況，由於公司股權分散，相信公司會考慮股東意向作出派息，有能力下會盡力維持。睇晒成個狀況，就明白點解壞消息見光，股價壓力仲未能夠全消。
陸羽仁
金融High Tea 舊文
來源 source: http://hdfin.stheadline.com
