中環在線：羅老太：捉得到嘉瑞 我劏咗佢 - 李華華
闊別傳媒一排嘅羅老太再次同大家見面，精神都唔錯。
譚德潤攝
唔少老人家大時大節都想一家人齊齊整整食餐飯，但有時咁簡單嘅願望，有錢人都未必做到。講緊嘅係打緊官司嘅鷹君（041）大股東羅老太一家。
噚日，代表羅老太一方，就修訂入稟狀嘅
裁決提出上訴，闊別傳媒一排嘅羅老太再次同大家見面，老太精神都唔錯，又主動同記者傾偈，經常陪住阿媽嘅六子啟瑞當然喺身邊。
羅老太主動提到，上月中秋節，三、四、五子（嘉瑞、康瑞、孔瑞）都冇同佢做節，咁幾個仔有冇打電話畀佢呢？老太又耍手擰頭話：「冇，乜都冇！」然後加多句：「呢啲絕種，唔好要喇！」唔知幾個仔聽到阿媽咁講，有乜想法呢。
啟瑞辦公室被擅闖
早前超強颱風山竹吹襲香港，波及到灣仔鷹君中心，繼而爆出啟瑞辦公室被擅闖，大批物件被搬離，最終啟瑞要報警處理。羅嘉瑞代表就解釋因為打風，office漏水要將物件搬走。提到此事，羅老太話「梗係嬲喇，我捉唔到，捉得到（羅嘉瑞）我劏咗佢！」，重申鷹君個個仔女都有份，家陣要等天追究。啟瑞亦向傳媒大呻，指嘉瑞做法唔合理，「唔想被迫離開（鷹君）」。
鷹君爭產案11月進入下半場，羅老太講明會隨時出現「幫大狀打氣」，到時可能又有大堆「金句」。
李華華
mailto:LiWaWa@AppleDaily.com
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
