大棋局：美國計錯數四十年 - Mr. Tregunter
美國副總統彭斯發表演說，宣示美中關係已醞釀敵對。 資料圖片
美國副總統彭斯發表的演說，其重要性在於，宣示美中關係已醞釀敵對。開戰前先公佈對方罪行，好讓己方其後所做的顯得合理，叫做檄文。彭斯演說就如一篇檄文。
由清末開始，力陳美國點樣幫中國，而中國點樣唔遵守協議，並企圖反制。整篇演說流露美國計錯數的懊悔，當中最重要的訊息，係近四十年計錯數。
資本主義同民主制度係同一個系統內的產品。當平民開始有錢時，會緊張自己嘅財產如何得到保護。信皇帝制咩，皇帝好就好，皇帝唔好就乜都冇。由法國大革命開始，西方人用血換來的覺悟，當權者吹到天花龍鳳都係嚇鬼，平民有權先至有計。因此民主制度從來唔係一套好高效率的制度，民主制度係平民要嚟保護自己嘅制度。
這一種覺悟，已根植於西方人骨髓之中。因著自己的經驗，美國認為中國亦會一樣。由1972年尼克遜訪華開始，用錢去扶持中國。美國人相信當中國人有錢後自然就會追求民主改革，整個國家會更加開放，所以扶持中國也就係長遠投資。可是直到今日先發覺呢單投資計錯數，中國人用腦力走捷徑世界上恐怕數一數二。中國人有錢之後選擇移民外國，用錢去買入現成嘅民主制度，傻佬先會用血去搞革命。使乜爭取民主？爭取有錢咪掂。
美中關係醞釀敵對
創意，亦作如是觀。當人人以為思想鉗制會愚化人民，扼殺創意，中國科技發展無法提升層次時，中國人亦走出一條自己的道路。使乜自己發明新嘢咁辛苦？買起人哋研究完的新科技，用併購，用技術轉移，自己改少少咪掂。美國計錯數，科技其實都可以用錢買。
之所以說這篇演說宣示美中關係已醞釀敵對，而非已經敵對，因彭斯最後特意講一句：美國仍然遵守一中原則。四十六年前尼克遜訪華同毛澤東做一單deal：美國承認一中原則，改為同中華人民共和國建交，此前已先將中華民國退出聯合國，但中國要聯同美國對抗蘇聯；美國提供經濟、軍事援助給中華人民共和國，但中國要對美國開放市場。
彭斯演說內的罪狀，部份當然有值得斟酌之處。二戰盟軍戰勝德國，有國家要德國嘅黃金儲備，蘇聯要德國嘅工業設備，但美國要嘅係德國最頂尖的科學家。像技術轉移，屬於買賣問題還是協議問題，其實有得拗，攤得出嚟講嘅，不能太認真。冇攤出嚟講嘅，趙孟能貴之，趙孟能賤之是否潛台詞，這點要認真。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.finance.appledaily.com
