【大茶飯】鋤dee會空手入白刃（青冰）
本周其中一個討論熱點，係恆大(3333)以高息發美元債，公司債並非青冰的專長，亦沒有30年債券投資經驗(笑)，無謂班門弄斧，但從另一個角度去睇，亦有些趣事可作分享。
先看恆大的股權架構，現時發行股數是130億股，許氏伉儷持有約77%，即101億股，
而按華置(0127)最新的公布，他們持有8.5億股，即6.5%，而甘比個人持有1.96億股，1.49%。鋤Dee會孖寶合共揸住111.46億股。
恆大8月時公佈，補發過去兩年的股息，合共1.13元人仔，按公司的匯率定價，等於每股1.287港元。計一計數，許老闆有101億股，即係收返130億股息，爽皮，而大劉嗰邊都有13.5億元。將這些股息及近日發美元債之事串連，就相當有趣了。
恆大發行18億美元債，三批債券將於2020，2022及2023年到期，息率為11%，13%及13.75%。就咁睇就認真唔開胃，發債要成13厘息，證明好水緊，亦撲唔到水，焗住要畀高息囉，利息支出沉重，咁內房股危矣，仲要發美元債，現在人仔日日跌，真係笨到無朋友。但係你要留意返，許老闆私人拿了10億美元買債，而這些債並非投資級別，一般的銀行唔揸得，需求有限，那8億餘額應該是「傻仔」買的。10億美元，即78億港元啦，但許老闆收息都收咗130億，根本就遊刃有餘，而大劉袋的股息，會否又拿一部分出來支持下，做下「傻仔」呢，冇人知，只要金額不是太大，亦未必會公佈。債息高，恆大支出沉重，Sorry，許老闆未來幾年都收返廿幾億利息啊，至於人仔貶值蝕匯水，都係那句，益都係益咗持有人，即係鋤Dee會，整件事有空手入白刃feel。
青冰認同內房唔會好似這兩年咁瘋狂，內房股未必是一個穩健的選擇，一向唔買恆大，不是因為覺得佢地前景唔好，或者債重好危險，講債重，應該有太多內房更重吧，9個月的賣樓收益已經是4480億人仔，已是其債務的兩倍，相反你睇嚇佢的行家，有唔少的銷售額不夠總債務多。青冰唔買恆大，源於看不通鋤Dee會的玩法，加上槍打出頭鳥，政策改變定必首當其衝，敬而遠之無妨吧，但切忌過於看淡此股或做淡，否則鋤Dee會又畀個Surprise你，就慘慘豬了。Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com
