金手指 - 孫柏文 2018年11月6日
金手指：給俄鋁的公開信 - 孫柏文
美國4月話制裁俄鋁，但俄鋁一直冇停產過，市價升最多嘅氧化鋁，更每季越產越多。資料圖片 適中字型 較大字型
噚日開市前，俄鋁（486）接二連三咁出通告。第一個通告，就係佢哋嘅第三季業績。第二，就係話署理CEO坐正。第三，就係佢哋話要拆遷，將公司註冊地，由英屬澤西島搬番老家俄羅斯。
睇完，真係忍唔住要寫今日篇公開信。不過分享公開信前，分析嚇佢嘅業績。首先，俄鋁嘅產量，三季都平均，有如我分享過我聽到嘅消息，佢哋冇停產過。市價升最多嘅氧化鋁，更每季越產越多。不過，因美帝喺四月話要制裁俄鋁，第二季嘅銷售量，大插插，啲貨係咁囤積。
不過到第三季，有如我9月18日講過，呢個制裁喺營運上「已名存實亡」，所以銷售量遠多過產量。令頭九個月嘅銷售量以噸計，比舊年同期只跌百分之五。而因鋁價本身今年大脹小回，氧化鋁價更越升越有，盈利爆升四成幾。如果第四季一個仙都賺唔到，用今日收市價計，市盈率得2.6倍，如果派息比率係盈利5成，咁就廿四厘股息。即如唔制裁，隻嘢股價都應該即時倍升。咁公開信想講咩？
親愛的Nikitin先生，
恭喜你正式坐正CEO。我知董事局通過要公司舉行EGM。要我哋小股東投票決議公司拆返俄羅斯。請你通知董事局，如果制裁甩身，不過都唔派息（盈利一半），我嗰啲股權，一定投反對。兼各董事送香蕉一隻畀佢哋食。你老闆小股東孫柏文字
P.S.大家小股東識做啦
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.finance.appledaily.com
