【財演算法】蔡嘉民：VIX可以點炒2
2018-11-6 15:26:31
上期簡介左一下咩係VIX，同埋提過2個好簡單嘅炒VIX策略，看似簡單，但的確係筆者幾鍾意嘅策略，而且回報唔錯。今次會講下點樣從唔同嘅VIX工具之中揀取啱自己嘅策略。
最簡單當然係玩VIX期貨，因為計算簡
單，同平時炒期指一樣，每點價值係固定嘅，每一個波幅點值1000蚊美金，即係如果喺VIX20嘅時候覺得市場波幅上升，買入後升到25，每張就會賺5000蚊美金。好處係計算方法非常簡單，不過壞處係每個月都需要轉倉，所以會涉及些少轉倉成本。係可能會唸，咁直接買遠期嘅VIX期貨咪可以囉？遠期VIX期貨嘅問題係，敏感度會大大降低，即使VIX指數升左5個波幅點，遠期期貨可以淨係上升1個波幅點，敏感度隨住期限愈長而下降。所以，為左捕捉短線市場嘅波動，通常都會交易最近期嘅組合，加上因為流通性比較高。
而第二個選擇，就係交易標的物嘅期權，例如直接炒SP500指數嘅期權，因為期權本身嘅定價就係取決於引伸波幅，假如你睇引伸波幅會上漲，只要買入期權，引伸波幅上升，就會令期權金上升。如果對後市方向無睇法，可以做一啲市場中性策略，例如Long strange/long traddle，將對沖值變為0，純粹曝露Vega值，無論市場點鬱，甚至唔鬱，只要VIX上升，就可以獲利。
不過問題係，Theta值同Gamma值並無對沖，通常正Vega都會係負Theta，即係時間係你嘅敵人。喺到期之前，如果引伸波幅帶來啲盈利唔夠覆蓋時間值損失，就會虧損。所以，用期權去炒波幅要留意時間值同埋市場方向，如果無特別睇法，都係炒返VIX期貨最簡單直接。當然，如果睇法係波幅變細的話，做期權短倉係可以賺取時間值，但Gamma值嘅曝露下，一旦市場單邊走，將會同時輸Vega同埋Gamma。
下次混埋VIX ETP討論！
財演算法 - 蔡嘉民 舊文
來源 source: http://www.winmoney.hk
