大棋局 - Mr. Tregunter 2019年1月29日
大棋局：中國金融深宮計 - Mr. Tregunter
朱鎔基在1995年大刀闊斧改革，將財政部發行國債及央行直接買國債兩件事斬開，從此分為兩個山頭。互聯網圖片 適中字型 較大字型
一個國家，財政部發行國債籌旗，關鍵在邊個埋單。市場埋單，還是央行埋單？如果係市場埋單，即市場根據國家經濟發展認為你還得起，只係預先透支國家未來收入；如果係央行埋單，發國債直接由央行買入，就等同直接印錢紙，已經唔係透支未來咁簡單。
如果你不是太年輕，應該記得內地以前有友誼商店，可以用外滙券買來佬貨。中國貨幣制度之一大分水嶺在1995年，1995年之前，央行可以直接買國債；1995年之後，唔可以。1995年前，中國嘅貨幣制度係亂嚟，共產黨自己都唔信人民幣，所以你帶外幣入去一定要交出嚟。
第一次直接印銀紙感覺好爽，貨幣無中生有。但好快會出問題，無端端多咗筆錢，貨幣購買力必然下降，通脹就嚟料。1994年中國通脹官方數字都去到24%，再咁搞落去同國民黨同一命運。所以朱鎔基大刀闊斧改革，將財政部發行國債及央行直接埋單兩件事斬開，1995年《人民銀行法》便規定人行不得直接買國債。
此前央行已派人去美國學嘢，明白現代貨幣政策可以用公開市場操作、利率等去調控，至此中國貨幣制度有了現代制度之雛型。
央行與財政部兩個山頭
上星期提及，由於貿易戰形勢之發展，中國外滙收入極大機會大幅減少。1995年前人民幣嘅信用唔多掂，在中國加入WTO後外滙收入大增，中國借助美元之信用去建立人民幣信用，也就係人民幣發行幾多基礎貨幣，主要睇收幾多外滙番嚟。就同國產手機借美國晶片、韓國屏幕話自己掂過碌蔗一樣。一旦外滙越來越少，要搵新抵押品發行人民幣，唔係話指嚇鼻哥印幾多就印幾多。國債，極大機會作為抵押品。
央行直接買國債之操作於1995年被斬開，從此分為兩個山頭。接下來要處理的，係央行如何在二級市場買國債。《人民銀行法》規定人行不得直接買國債，指一級市場，二級市場不一定。2007年發行之特別國債，及2002年之公開市場操作，人行都有在二級市場買入國債，只係唔常做。中國國債二級市場量唔夠大，流動性低，係難做，唔係唔可以做，這點要明白。
央行同財政部兩個山頭，所謂「研究將國債與央行貨幣政策操作銜接起來」，無論點做，如果最後央行要配合財政部，等於央行讓渡部份權力。由去年央行同財政部公開互窒開始，至此應該看得懂發生甚麼事。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.finance.appledaily.com
