大灣區基建股媲美房託
2019年02月21日
港股昨日再向上突破，市場繼續尋找落注對象。粵港澳大灣區規劃公佈，市場發掘區內有潛力公司。有中環茶友話，若論前景當數科技、工業同埋地產股，若然想穩穩陣陣分一杯羮，基建股應該有得諗。
廣東省早年為咗拓展基建，推動收費項目，有幾
間公司都係做呢類項目，好似合和公路基建(737) 、越秀交通基建(1052) 同深圳高速公路(548) 。呢類公司過去表現穩定，個別仲因為起路，所以擁有一啲地塊，在地區發展後，呢啲地塊就可以變錢，所以長遠都會升值。O依家大灣區11個城市起動，必然會增加區內人流同物流，呢個趨勢有好有壞。壞處係內地近年大力推動區域鐵路網絡，不斷用高鐵接通各地，減少公路需求。
唔怕悶先收息等發圍
另一方面，人流增加無論點樣都會觸發公路需求，好似虎門大橋長期塞車，於是政府大力投資，興建深圳至中山嘅超級公路。喺大灣區規劃後，呢啲公路公司都考慮有冇收購機會，好似越秀交通基建(1052) 副董事長兼總經理何柏青喺公佈後即時透露，目前喺大灣區同中西部長江經濟帶地區，觀望可收購嘅項目。
公司近年來各項目股本回報率(ROE)維持喺10%左右，對於未來計劃收購嘅項目，期望可達到呢個水平。越秀O依家手頭仲有20億元人民幣現金流盈餘，目前融資成本約3.97%，低過市場平均融資水平4.75%。如果能夠搵到有10%回報嘅收購項目，咁借錢投資都幾好，關鍵係有冇好項目。O依家大灣區動起嚟，理論上機會應該增加。
喺呢類股份當中，粵運交通(3399) 息率有六厘，深高速有小小地產概念，息率略低有4厘。深高速控股股東深圳國際(152) 早前通過附屬機構增持該公司H股，增持數量唔超過該公司總股本嘅2%，總代價唔超過四億元。有茶友話，最近市場炒息口轉向，同利率有關嘅房託股好似領展(823) 紛紛創新高，噚日仲升破90元大關，收報90.05元，升咗1.4%。其他房託股好似陽光房託(435) 同泓富(808) 都造好，大灣區基建股息率普遍高過呢啲房託，如果唔怕悶買嚟收息等發圍，係咪計落更啱數口呢？
港股噚日收市再創半年高，恒指收市升285點，報28514點，係舊年8月9日以來收市新高；國指收報11229點，升112點。大市成交金額增至1086億元。恒生(011) 業績理想，股價高見189.2元，創一個月新高，收升1.2%，報188.4元。友邦(1299) 更創上市新高，高見76元，收升2%，報75.75元。
中資金融股表現突出，內險股造好，國壽(2628) 突破20元大關，高見20.8元，創近八個月高，收升4.3%，報20.6元；中國太保(2601) 升2.8%，報29.55元。內銀股工行(1398) 升0.7%，報5.93元；招商銀行(3968) 升1.5%，報34.5元；民生銀行(1988) 升1.2%，報5.99元。
喺反彈浪落後嘅中資證券股發力向上，中信證券(6030) 收升2.6%，報18.22元。中金公司(3908) 收升5.8%，報17.9元，更一度升至18.8元，創近一年高；阿里斥資超過18億元入股中金公司，期望結合雙方金融同科技專長。
興勝炒上博收禮物
這兩日有隻股份興勝創建(896) 開動，公司早前預告會喺2月22日向董事會提交決議案，審議建議分拆美亨實業喺聯交所主板獨立上市，建議中該公司將向合資格股東實物分派所持美亨全部已發行股本。
美亨實業係做分包商，主要從事外牆及幕牆系統(以幕牆及鋁門窗為主)嘅設計、供應及安裝。
興勝創建呢隻股雖然細兼有啲冷門，但管理層不時有動作，O依家披露有意分拆派股，可能股價升定等收禮物。
陸羽仁
金融High Tea 舊文
來源 source: http://hdfin.stheadline.com
