【魚樂無窮】炒股講到尾最緊要舒服（唐牛）
早幾日在facebook的沽貨post，惹來極大迴響，事緣當日搭車途中，見到身旁中年阿叔，狂撳中國鐵塔（788）股價，這個畫面立即觸動本人神經，落車後（唔好咁寸在人家面前沽貨）即沽清所持中國鐵塔，袋袋平安。
雖然而家肯肯定未到全民皆股的瘋狂地步，
但恒指由低位爆升近5,000點，吸引不少散戶重新入場，卻是不爭的事實，加上近期5G概念股似乎舉步為艱，倒不如先行退場，有勢再追最多買貴些，總好過揸住貨食唔安坐唔樂。
事實上，中港美股市近日都面對同一個問題，就係在大關口出現無形阻力，港股在29000點好事多磨，A股則仍未衝穿3000點，道指於26000點上下穿梭，在在反映好消息差不多盡出下，大家都爭相食糊。嫌我煩都要講多次，現階段不是all in時候，當然也不是叫你清倉，有現金有貨底就最舒服，at least最後唔好彩要走火警，你都一定可以全身而退，笑到最後。
鳳凰衛視（2008）宣佈，旗下鳳凰新媒體擬出售所持Particle 32%股權，總代價35億元，鳳凰衛視將因而錄得重大收益，但實際數字要等交易完成後才計到，昨日股價曾大升23%，埋單收窄至7.1%，相信與同時間宣佈盈警有關。不過，集團過去一年均在低位橫行，加上中期業績早見紅，某程度上已反映相關壞消息，如果因為咁有低吸機會，實在千載難逢。穩陣計嘅，升穿昨日平均價0.95元始入場，勝算會較高，跌穿0.84元止蝕。
唐牛fb專頁
http://www.fb.com/tongcow88
魚樂無窮 - 唐牛 舊文
來源 source: http://hk.finance.yahoo.com
