鳳凰衛視賣海鮮
2019年03月01日
美國總統特朗普今個禮拜有啲頭頭碰着黑嘅感覺，但從港股角度嚟睇，特朗普食悶棍就未必係壞事。
過去兩日，特朗普同北韓領導人金正恩喺越南河內會面，希望達成朝鮮半島無核化，會前更吹到會達成《河內協議》。但到噚日中午，會議提早結束，美方官員
「離場」，兩國領袖午宴取消，白宮終於面對現實，透露雙方未能達成協議，大家會繼續商討，言下之意係此行食咗白果。
同一時間，特朗普嘅前律師就做「二五仔」，喺國會大爆佢向緋聞女星畀「掩口費」，同時又指使律師向太太講大話。有記者喺特金會問佢有咩回應，令佢大為不滿，一度想喺往後場合收緊採訪。
一項資產同公司市值相若
特朗普接連食悶棍，有中環茶友笑言唔係黑心，若然佢同金仔相談甚歡，大有收穫，必然意氣風發，對中國談判底氣必然大壯，恐怕冇咁易達成協議。從金仔角度嚟睇，若然承諾全面放棄核武，無疑係自棄皇牌，實在有啲不智，而且佢同北京素有聯繫。正如特朗普所講，國家主席習近平係橋牌高手，自然會用好北韓呢張牌。
特朗普同北韓冇協議，下一步就要睇番中美貿易談判。O依家白宮已提出延長談判時間，美國貿易代表萊特希澤出席眾議院中美貿易聽證會時唱得比較淡，表示仍然需要同中國進行大量工作，先能夠達成貿易協議，順手批評中國冇履行過去作出嘅好多承諾。
萊特希澤話，中國只係買更多美國貨並唔夠，亦要進行結構性改革。中美貿易談判有分歧，雙方要達成協議，其實好睇總統取態，如果特朗普唔想撕破面皮，至少喺限期上會有彈性。美朝冇協議，特朗普要攞彩的話，就要寄望同中國有成果，故此對港股有間接利好作用。
外交消息拉鋸，港股繼續消化調整，鳳凰衛視(2008) 股價逆市造好，收漲7%，報0.9元。股價造好係因為公司宣佈同一名獨立第三方就潛在出售簽訂意向書，將出售資產為鳳凰新媒體持有在Particle Inc.嘅32%股權。受限於正式合約簽訂，買方為出售股份應付嘅交易代價為現金35億港元。交易後，鳳凰新媒體持有Particle Inc.嘅股權約5.63%。以噚日收市價計，鳳凰衛視市值只係44億元，未急升前市值同Particle Inc.價值相若，所以消息一出，即刻推升股價。
今次出售嘅公司，主要業務係經營「—點資訊」，簡單嚟講，係一個內地個人化新聞和時尚生活信息應用程式，允許用戶通過流動通訊設備有效評鑑和探索所需內容。一點準備喺內地上A股，今次交易可能係為上市重組架構。不過，一點喺網上採集內容，喺中國提出要注重知識產權嘅大氣候下被約談，但因為話想上A股而身價不菲，竟然大過已上市嘅鳳凰衛視幾倍，可見呢啲新聞資產真係海鮮價。
李寧股價又見一年高
國家統計局公佈，官方製造業採購經理指數(PMI)由1月嘅49.5，跌至2月份嘅49.2，回落0.3個百分點，遜於市場預期嘅49.5，創三年最低，亦係連續三個月處於收縮水平。港股雖然表現反覆，但都有唔少股份續創一年高位。恒指收報28633點，跌124點；國指收跌89點，報11367點。大市成交金額1212億元。
藍籌強勢股友邦(1299) 升近2%，報78.5元；煤氣(003) 升1%，報18.18元，雙雙創新高。體育股李寧(2331) 造好，收升2%，報11元，創一年新高。
另外，越秀地產(123) 舊年盈利增逾兩成，加上集團以溢價22%引入廣州地鐵，擴大股本至約19.9%，越秀地產收飆10.4%，報1.81元。
陸羽仁
金融High Tea 舊文
來源 source: http://hdfin.stheadline.com
