大股東又扑騰訊一棍
2019年03月26日
美債孳息出現長息低過美息的異象，反映市場預期長遠利息會下調，原因當然係經濟不振，結果觸發全球股市調整。港股開市即跌，全日在低位掙扎，最後下挫590點，跌幅2%唔算細，但亦在預期之內。
周六、日期間，關於中美貿易談判的阻力逐漸
曝光，爭拗之一是中方要求外資，必須要有中國夥伴，先可發展雲技術，同時資料要在境內處理。另外，美國方面就要求保留關稅，作為確保中國執行協議的保證，若然發覺違規，美方可以採取懲罰，而且內地無得上訴。美國的條件頗辣，中國未能接受，看來下個星期雙方重啟談判，中國不會明顯妥協，且看雙方會否各退一步。
分拆做法似看淡前景
歐美經濟數據欠佳，上證指數失守3100點關，收市跌近2%，結束兩連升，兩市成交合計升至8194億元。中美股市先後下挫，恒指跟隨外圍走勢裂口低開611點後，全日於低位反覆上落，高低位分別見28702點及28463點，波幅239點，收市挨近28500點水平，收報28523點，瀉590點；國指跑輸大市，收報11232點，挫285點。
藍籌股近乎全軍覆沒，僅兩隻錄得升幅。騰訊(700) 挫3%，收報353.8元；友邦(1299) 跌2.2%，收報75.4元；滙控(005) 跌1.6%，收報63.7元；建行(939) 跌1.9%，收報6.81元；平保(2318) 及工行(1398) 齊挫2.4%，六隻藍籌股已佔去恒指一半跌幅。
騰訊上周公佈嘅業績平平，新遊戲審批都食白果。最新消息係南非大股東有意將互聯網資產分拆上市，呢個消息對騰訊有小小利淡。南非大股東喺去年470元嘅歷史高位，首度減持騰訊，揭開騰訊大跌序幕。現時大股東又話想分拆互聯網資產，看來係覺得手頭投資未來增長會放緩，想伺機套現。南非大股東手頭的互聯網資產最大一項都係騰訊，若然成事點都會吸走本來買騰訊嘅資金，形同搶客。牌面睇，投資者若看好騰訊，不如直接買公司股價，點解要買控股公司呢？所以除非係大折讓，否則大股東吸水大計唔易成功。雖然分拆消息十劃都未有一撇，但撞正大市想跌，就變成扑股王一棍，令股價碌完再跌，再度跑輸大市。
股市出現調整，中環茶友少做少錯。中環茶友有興趣嘅反而係電視廣播(511，TVB)行政總裁李寶安接受訪問，表明唔會做「白武士」拯救陷入財困嘅星美控股(198) ，上周仲成立特別小組，研究點樣收回現金，強調董事會旨在收回現金，對入股星美持保留態度，認為「如果收番晒啲錢，想買星美股票好易，唔買又得，當然係收番錢好。」
基金應後悔反對TVB回購
TVB現時持有星美兩筆高息債中，包括1.8億元的無抵押定息債券，以及有41%戲院抵押的6.5億元可換股債券，TVB分別以全數及一半價值作減值，上周業績就作出合共減值虧損約5億港元。惟核數師報告對此提出保留意見，未能確定該入帳方式是否適當。
李寶安透露，公司有約40億元債券組合，除了星美的8.3億元債、國儲能源約9360萬元債，以及8億元乃贖回自行發行的部份據票，餘下約23億元則分散投資，有50至60隻債券。去年債券投資的利息收入約1.95億元，扣除1.28億元融資成本後錄得盈餘。照咁睇，管理層可能係見生意難做，想利用公司穩健財政做啲投資增加收入，點知上錯咗星美條船。
受星美債券大撇帳影響，TVB股價插到去近年低位14.02元，昨日收報15.1元。茶友話，2017年TVB提出以35元回購股份，當時有幾個基金反對，認為咁會益咗大股東鞏固控制權，結果建議未能落實。
過去好多大股東的回購或私有化建議，都有基金計完數提出反對，但多數結果都冇好下場。當日基金只係睇此舉好似益咗大股東，冇留意本業經營正在走下坡，如果當日肯接受高價回購，現在可能已經成功離場，公司做咗呢個方案，亦可能都無咁多資金去買債。現在回購不成，走去買債，變成雙輸，說明做小股東見好即收，往往比一味拗數明智。
陸羽仁
金融High Tea - 陸羽仁 舊文
來源 source: http://hdfin.stheadline.com
