科技股回歸內地不是壞事
2019年03月04日
上周五港股升178點，主要係同內地因素有關。MSCI宣佈大幅提高A股權重，逐步由佔MSCI指數5%升至20%，更首次納入創業板股票。另外，中國財新2月製造業指數(PMI)高過市場預期，出現一個官方PMI回軟，但反映民企狀況嘅財
新PMI轉強現象，顯示中國嘅放水救市措施，開始出現穩定市場嘅成效。
港股連跌三日後反彈，3月開局上升。上周五同A股表現有關嘅股份表現最好，例如有好多內地股票資產嘅國壽(2628) 收升5.6%，報22.8元，係上周五表現最好藍籌；中國平安(2318) 升1.9%，收報84.25元。內地券商股表現更好，中金公司(3908) 升5.2%，收報19.18元；中國銀河(6881) 升6.7%，收報5.7元。
改規則放寬股市資金
中美談判正在進行，中國經濟繼續下滑，中國開猛水喉催谷股市，例如內銀大量發債集資去充實資本，農行(1228) 獲准發行唔超過1200億元人民幣嘅二級資本債；民生銀行(1988) 獲准發行唔超過400億元人民幣嘅二級資本債。等銀行先吸納買債資金再去放貸，係一種鼓勵銀行放水嘅行徑。
證券市場方面亦有動作，中證監1月底曾表示，上海及深圳交易所正在修訂《融資融券交易實施細則》，擬取消平倉線唔可以低於130%嘅統一限制，改為由證券公司同客戶制訂最低維持擔保比例。
中國證監會透過傳真回答彭博有關放鬆證券市場監管嘅提問，話調整證券公司風險控制指標計算標準，目的係要能夠更準確同客觀反映相關投資風險，引導券商合理配置資產。中證監指作出相關調整，旨在鼓勵價值投資，並控制高風險投資。中證監仲完善咗融資融券(孖展借貸和借貨)機制，此舉可以提高交易嘅市場化程度，係取消最低維持擔保比例統一嘅限制，並非取消相關比例或者改變風險要求，而係要券商和客戶自主約定。
簡單嚟講，中證監呢啲新措施，朝住適度放鬆嘅方式，對鼓勵券商合理融資融券有幫助。因為呢個原因，刺激內地券商股上周五股價爆升。
中美膠着 股市谷高
世界局勢O依家正急速轉變，中國政府嘅應對手法都有變化。美朝峰會泡湯後，上周末傳嚟加拿大司法部正式應美國要求，引渡華為副董事長孟晚舟嘅程序。加拿大司法部話，有足夠證據畀法院做引渡決定，簽署授權進行令，允許卑斯省法院正式啟動引渡聆訊。
加拿大政府出招，隨時係美國指使，可以視作美國向中國施壓嘅一種手段。美國總統特朗普正急於希望中美貿易談判有成果，操控孟晚舟呢張牌向中國施壓嘅動機明顯。
中央就謹慎回應，方向主要係強化自己以應對外來衝擊。頂住股市似乎係其中一個重要環節，中國股市興旺，一方面可以提振市場消費信心，有利承托經濟。二就係同美國談判時，可以擺出一個「你急我唔急」嘅姿態，有利中國尋求更好嘅談判結果。呢個就出現一個中美雖然未有貿易協議，但中國股市愈嚟愈好嘅狀況。
中央刺激股市嘅另一招，係加快科創板進程。上周五夜晚，中國證監會同上海證交所正式發佈《實施設立科創板的試點註冊相關業務和配套指引》，意味經過一個月收集意見後，市場高度關注嘅科創板試點規則正式公佈實施。今次《指引》吸納咗市場意見，調整咗部份規則，其中之一係進一步明確海外上市企業回歸標準。營業收入快速增長、擁有自主研發、國際領先技術、有競爭優勢，尚未喺境外上市嘅紅籌企業，預計市值唔低過100億元，最近一年營業收入唔低過5億元，可以申請喺科創板上市。
科創板超音速出爐
國泰君安研究所高級市場分析師蘇徽話，發展科創板對整個中國資本市場意義重大，佢唔止係單一板塊，亦係代表咗整個資本市場制度一種變革同創新，整個中國資本市場會變得愈嚟愈市場化同法制化。
值得注意嘅係，科創板作為上交所新設立嘅獨立板塊，同現行A股市場相比，有幾項重大突破。第一，允許未有盈利嘅公司上市。第二，允許不同投票權架構公司上市。第三，允許紅籌同VIE(即海外控股)架構企業上市。
中央好明顯係開始對創科企業有更高包容度，將優先支持符合國家戰略、擁有關鍵核心技術、科技創新能力突出，具有較強成長性嘅企業喺內地上市。
中國推出科創板，預計會吸引O依家喺海外上市嘅大型科技公司回歸，例如O依家大量喺美國納斯達克上市嘅VIE架構公司。佢哋創立時，搞咗個由外資公司擁有嘅架構，例如喺海外避稅天堂成立公司，由佢哋控制內地嘅科技企業。由於內地股市唔容許外資公司上市，呢類公司法律地位係外資，只能去美國或者香港上市。另外就係同股不同權公司，阿里巴巴就係典型例子，內地過往都唔容許呢類公司上市。
內地極速推出科創板，顯然有催谷股市含意。成立科創板後，相信會吸引大量呢類公司回歸，對搞活內地資本市場有好大幫助。試想一下，如果騰訊(700) 、阿里巴巴、百度呢三巨頭都回歸中國上市，帶嚟嘅成交量會有多大？
巨企上場 吸光資金
咁內地科創板嘅新猷，對港股又孰好孰壞呢？舊年香港容許同股不同權公司上市，有大批內地科技企業來港上市，但由於當時市況低迷，市場冇新資金投入，結果出現新公司上市吸走現有科技公司資金嘅狀況，基金大戶沽售手上嘅科技股，換入條件更吸引嘅新上市科技股，搞到原有科技股股價大跌，結果影響成個板塊。新上市科技股嘅表現普遍不濟，好多都跌破咗招股價。
A股基金 仍然可炒
中國推出科創板，由於中國資本市場表現會比香港好，新股表現會較好，市盈率定價都較高，炒風更盛，預計將來呢類科技公司可能更多選擇返內地上市，唔來港上市。或者內地二次上市，以騰訊為例，若然喺內地上市，內地股民想買騰訊，就唔會透過港股通到香港買，港股成交甚至新股上市都會減少，咁會對港交所(388) 不利，因為港交所收入來源主要同大市成交量有關。
若然大量科技股來港上市，總體成交上升，對港交所有利，反之則不利。不過，科技股減少來港上市，對港股未必係壞影響。因為科技新股供應源源不絕，會吸走市場資金。但係如果供應減少，現有科技股反而會有較佳表現，因為市場要炒，只能炒現有股份。
講返內地股市走勢，可以預計，內地放水救市、搞活證券市場嘅趨勢，短期內唔會改變。加上人大政協兩會即將召開，救市政策會喺會議前後密集出台，股市表現較好，官員喺兩會上就會少受代表質疑，所以3月應係炒作A股嘅好時機。A股指數基金直接反映大市走勢，炒A股指數基金，會比較簡單直接，唔使用腦揀股都可以入市，其中可以考慮華夏滬深300指數基金(3188) 。當然，大家都可以買波動更大嘅內地券商股。不過，由於券商股近期升幅唔細，買呢類急升股要定10%止蝕，因為一旦回吐，可以回得好急。
陸羽仁
金融High Tea 舊文
來源 source: http://hdfin.stheadline.com
