【異動尋寶】「鐵塔」淩雲 貴得嚇人？（魏力）
恒指困在30000至30259之間上落，30000點為心理大關支持，30259則為2018年6月的下跌裂口，當大家都驚補完裂口就回，自然你眼望我眼，等人出手破呢個大阻力，之後再跟風追入，結果就是勒住勒住，一上30200就腳軟。
不過，近日港
匯忽然轉強，昨日高見7.8414，為兩個月新高；隔夜拆息也升穿2厘，反映短錢緊張，分析指資金可能正部署流入股市，孰真孰假不得而知，但金管局不用接錢，銀行體系結餘維持在安全水平，總非壞事。
另一邊廂，上證衝上3200關之後同樣腳震，昨日更是即市大玩過山車，隔夜飯都快要嘔出，最新消息指，今年來A股一路炒上，大股東卻在瘋狂減持，年初以來多達865家公司主要股東掟貨，套現2400億人仔，規模創四年新高，老散擔心接火棒，自然停一停、諗多幾諗，大戶震貨自然得心應手。
指數打橫行，但板塊卻炒個不亦樂乎，唞咗一輪的5G股又炒過，中國鐵塔（788）破頂狂升，昨日成交30億銀，等於滙控（005）加埋港交所（388）的成交，一望PE嚇死人，成107倍，即使計埋今年增長，仍高達50幾倍！
不過，國際對鐵塔股的通用估值方式是用EV/EBITDA，現價（2.18元）計已達9.5倍，與美國同業逾20倍的估值去比，當然仍有大折讓，但人家是接第三方客戶的訂單，食水可以深一點；反觀中國鐵塔卻不同──中移動、聯通、中電信既是客戶，也是股東，基本存在利益衝突，估值自然要打個大折。
魏力掃了幾份大行報告，12個月目標價約莫都是2蚊，反映現價可能已炒突了一點。用技術指標分析，9 RSI衝到83，兼且完全升穿保力加頂部，就算再強勢，應該都要橫行兩三日消化超買，到時再睇落唔落注。
筆者為證監會持牌人，未持有上述提及股份財務權益。
www.facebook.com/2012jason
異動尋寶 - 魏力 舊文
來源 source: http://hk.finance.yahoo.com
