智取大市 - 晉佳 2019年4月10日
智取大市：復蘇概念股等起飛 - 晉佳
內地航空股身估值非貴，加上今年需求回升、油價不高及徵費減半，今年盈利幾可肯定勝舊年。 資料圖片 適中字型 較大字型
股市展開中期升浪，點樣由低估值炒上高估值？過程往往由資金流入速度去主宰。經典例子係2015年4月港股大時代，所有資金齊齊同一時間衝搶股票，於是恒指最juicy嘅接近3,000點升勢，集中喺1.1個交易日完成。遇上呢種情況當然鬥快衝有著數，慢少少都淪為接火棒。
至於今次升市，由低估值去到炒經濟復蘇，資金流入速度慢得多。目前強勢股股價普遍已由低位升逾倍，能夠受惠復蘇概念嘅，未升足1倍或者最近進入深度調整嘅，始終會擇日發力上升。假如終點係由低位升1.5倍先至合理，喺資金緩慢流入之下，板塊輪流炒，策略應該係候調整低吸。
航空股上周四因民航發展基金徵費減半而大幅裂口高開一兩成。航空股本身估值非貴，三大內地航空股市賬率介乎1.3倍至1.44倍，國航（753）、南航（1055）、東航（670）舊年市盈率分別為16.8倍、10.6倍、11.6倍，今年需求回升、油價不高加上民航發展基金徵費減半，本身航空股投入大量固定資產，經營槓桿偏高，盈利幾可肯定勝舊年。記住，傳統周期股宜撈不宜追，整固期間14天RSI能夠去返50水平，就可以考慮吸納。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com
