金手指 - 孫柏文 2019年5月14日
馬上成為壹會員
會員註冊/登入
【金手指】卒之明貿戰撠在哪 - 孫柏文
劉鶴上周同美國代表團開咗冇幾粒鐘會，估大陸鷹派可能會話事。 資料圖片 適中字型 較大字型
禮拜一佛誕，貿戰升溫下，好友斬首被緩一天？點都好，上周中美代表團喺華盛頓hea開咗冇幾粒鐘會後，我國劉鶴面色極差咁被CCTV訪問，講到大陸三條底線。孫柏文睇落，其中兩條一定有得傾。就係迫大陸買嘢，金額唔可以冇譜。同埋協議字面上要留番啲面畀大陸。
不過，有一條確實係難搞。就係大陸話一簽協議，就要美帝即撤貿戰立嘅關稅。大陸咁講，即係美帝話簽咗都唔撤啦。咁幾時撤？以我當年喺美國讀書四年，知道美國仔啲脾氣，一定係「簽咗，落實埋，先撤」。
點解要等落實埋？你作為香港人，你懂的。中共當年夠話我哋2007年真普選特首啦，今日都2019年囉。中共簽協議，誠信值比印協議條文嗰疊紙嘅價值低。老實講，大陸嗰邊就算真心想落實協議條文，都要時間。嗰六樣嘢真做（即零關稅、零非關稅壁壘、零補貼、停偷知識產權、停迫轉讓技術、允許美國人自由買你大陸公司）係繼79年宣佈改革開放後，經濟運作最大嘅改變。
睇劉鶴面色，我諗大陸鷹派可能會話事。因大陸真係好多人自我陶醉咁信小打小勝、大打大勝。網上評論界800磅大猩猩蕭若元都話佢已搞緊喺台灣開戶口走錢。真正地理上分散資產，即唔係經香港銀行買個「亞洲基金」嗰隻，快成硬道理了。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.finance.appledaily.com
