冰說聰明 - 青冰 2019年5月30日
馬上成為壹會員
會員註冊/登入
【冰說聰明】巴巴回家 小加笑了 - 青冰
傳聞阿里巴巴正考慮下半年來香港作第二上市，是否有政治原因，自己諗。圖為馬雲。資料圖片 適中字型 較大字型
傳聞阿里巴巴正考慮下半年來香港作第二上市，馬雲以前多次提及，未能夠在香港上市是一大遺憾，咁如果大師兄終於歸位，馬雲開心，小加同志就更開心啦。揀呢個時間返來，究竟係搞掂咗同股不同權（W股），時機成熟了，還是政治氣氛使然，怯於美國對中國企業的封殺威脅，自己諗。
回帶睇返W股，現時已有兩大千億企業，小米（1810）及美團（3690），不過上市以來都係負皮居多，雖然恒指公司在諮商後，認為可以將W股加入恒生綜合指數，為港股通鋪路，但滬深交易所在小米上市後急煞停，拖拖拉拉幾個月，至去年底才確認接受，預計最快在今年下半年可讓北水買賣，但其實呢，細節係仲未公佈嘅，所以大媽能否在第三季買到小米同美團，仲要等內地監管機構發落。不過咁，如果將巴巴上市之事串連起來，似乎就一氣呵成了，先讓師弟們開路，吃盡負皮，打通港股通後畀大媽炒嚇，一切順暢後才歡迎大師兄，一個字：掂。
對於巴巴來說，回港上市除咗係遠離危險的地方，也別具政治意義，堂堂國內最頂尖企業，走去外地上市，普羅內地股民又買唔到賺唔到你錢，真係成何體統呢。外電報道話，今次會集資200億美元，咁香港食唔食得落呀，按現時的市況，就梗係會哽死啦，但青冰反而覺得，如果係事在必行，巴巴上市前港股反而會翻生㖭。
順帶一提，如果港股通落實細節，加入同股不股權股份，相信同期作諮詢的外國公司及合訂證券，應會一同加入，上年8月已納入恒生綜合指數的相關股份共有8隻，當中俄鋁（486）、Prada（1913）及香港電訊（6823），應該頗受大媽喜愛，而全靠大陸旅客幫襯的柬埔寨賭股金界（3918），更加可能是黑馬。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.finance.appledaily.com
